Den e caso di Paola Kock, polis cu nan a retira di su funcion pa menciona nomber di un colega, ta hayando un rabo largo. No solamente e dossier y e historia di esaki ta mustra den un persecucion politico, pero ta mustra tambe cu a comete erornan grandi. Eror di kende(nan) si por a causa un daño na investigacion IBiS y pone cu 3 miyon florin hinca den esaki bay perdi.
Paola Kock ta e funcionario policial cu e yiu di actual Minister di Husticia a conta riba e actonan inmoral cu lo tabata pasa cu ne momentonan cu e ta cerca su tata (Minister di Husticia actual Rocco Tjon). For di e momento ey a obstaculisa su trabou y crecemento den Cuerpo Policial, te ora cu a haya loke ta bisa ta un motibo valido pa retir’e. Sinembargo Corte di Prome Instancia a bisa cu e decision pa retir’e ta uno mucho drastico. Gobierno toch a dicidi di apela e caso cu a wordo trata un siman atras.
Manera abogado Illes a bisa, con e simpel presencia di Kock na cas di e sospechoso Paul Croes por perhudica un investigacion. Tur lo contrario a sosode. Kock a duna informacion na KPA pa evita cu ta perhudica e investigacion. Esaki a sosode na momento cu un ex-chauffeur di un minister a nota movecion di hende riba su tereno na e vehiculo di e ex-minister y a sospecha cu tabata miembronan di RST.
Tambe a ser papia di un video cu bisiñanan lo tabatin den nan poder di e movecionnan aki. Na momento cu su casa a cont’e kico e chauffeur a mira, mesora Kock a yama su hefe pa inform’e di esaki pero e no a contesta y na su turno a tuma contacto cu su colega polis, Ludy Wix, pa e informa su hefe di loke ta pasando. Den e caso aki ni Ludy Wix ni Fredson Panneflek no a traha un rapport di e informe cu Kock a informanan di dje. Despues di mas di 1 aña Ludy Wix ta declara cu Kock no a bis’e cu e informacion tabata pa wordo pasa pa e hefe.
