Sinterklaas y Zwarte Piet tabata un di e temanan treci dilanti den e conferencia di prensa di Gobierno dialuna mainta unda cu a hiba palabra Minister encarga cu Asunto di Cultura Xiomara Maduro. A papia di e hecho con ultimo añanan mas y mas e tema aki a lanta discusion na Aruba.
E fiesta aki ta uno hopi popular na Aruba, cu a sigui cu e tradicion di Hulanda cu ta e storia di Obispo Nicolas na Turkia, y cu tabata patrono di e muchanan di scol. Despues e storia tras di e celebracion aki cu a cana yega resto di Europa, incluyendo Hulanda. Un celebracion cu den transcurso di tempo a conoce cambionan. E prome biaha cu a mustra su ayudante tabata den un buki di prenchi na 1850, cu ta un Moro. Djeinan a nace e figura cu den transcurso di tempo a haya e nomber di Zwarte Piet. Di un ayudante keto, el a bira e ayudante cu ruchi y saco.
Den añanan 60 a cuminsa cuestiona e figura y papia di descriminacion. Zwarte Piet a bira amigo di muchanan, unda cu e ruchi a disparce y e saco a bira mas chikito. No tabata pinta e cara mas preto, pero di color.
Tabatin manifestacion rond mundo cual mas y mas hende a cuminsa cuestiona e descriminacion den e celebracion aki. P’esey ta exigi mas di Gobierno den e celebracion aki, cu Aruba ta yudando cu financiamento pa cu e celebracion na Aruba. Gobierno no kier apoya algo unda e hendenan ta sinti cu tin descriminacion. Pa tal motibo ta trata di yega na un consensus, pues pa e celebracion sigui pero sin e tono descrminatorio.
Hulanda tabata conoci como un pais grandi den e negoshi di esclavo y tabatin e efecto riba e tradicion di celebracion di Sinterklaas. E celebracion aki ta keda na cada un pa hacie con nan kier. Den e caso aki ta haya cu su ayudante por tin cualkier color, no necesariamente e mester ta pinta preto. E por ta un ayudante di color, cu no ta pa descrimina ningun hende. E idea ta pa e fiesta ta uno alegre, pa e muchanan, comparti regalo cu otro, Minister Maduro a bisa y a enfatisa cu e no t’ey pa descrimina.
Pa e ariba menciona Gobierno no ta fomenta descrminacion, pa cual e pietnan mester ta na nos color of di diferente color. Ta pidi pa e ta un fiesta alegre, no mester bay den manifestacion contra un fiesta di mucha.
Pa loke ta e celebracion di e aña’ki, debi na e situacion di COVID-19, e fiesta ta bira un dificultad. No por tin un parada. Ta bay pensa con ta bay realisa e celebracion sin aglomeracion. Pues no ta bay stop Sinterklaas.
