ECT ta un tecnica hopi moderno den e tratamento di varios disturbio psikiatrico grave cu por forma un peliger of cu, no obstante e uso di remedi pa largo tempo, no ta duna cura ni mehoracion.
Ta trata mas tanto di disturbionan di depresion, mania of un combinacion di e disturbionan aki.
Den casonan di atento di suicidio, catatonia, psicosis, y condicion di alimentacion sumamente grave, e terapia di ECT por ta di urgencia y por salba un bida. Tambe e terapia di ECG por forma parti di un tratamento, por ehempel den casonan di disturbionan cu psicosis manera schizofrenia, den caso di otro disturbionan psikiatrico of condicionnan fisico. Den caso di algun disturbio psikiatrico infrecuente, e terapia di ECT por salba bida.
For di un investigacion recien y internacional a keda demostra cu cerca hendenan cu ta sufri di un disturbio di depresion 70.6% tabatin un resultado positivo favorabel y cerca 50.9 % por hasta papia di un cura di depresion.
Den caso di depresion cu caracteristicanan psicotico, e cifranan ta miho ainda: aki e percentahe di reaccionnan positivo y favorable ta 78.9% y esnan cu a cura ta 57.8%
Tin hopi storia tocante e terapia di ECT cu ta incorecto; mayoria di nan ta papia di e trato inhumano cu e ta wordo duna y ta insinua cu e terapia ta haci daño na e curpa y mente di hende.
Esaki ta absolutamente incorecto.
E terapia moderno di ECT ta un tratamento “safe” y sigur cu, naturalmente, y manera tur otro tratamento medico, tin biaha por duna efectonan secundario Despues di un sesion, e efectonan secundario mas comun ta, un poco dolor di cabes, dolor di musculonan of mariamento. Problemanan di memoria, cu casi semper ta pasahero, ta presenta cerca, no mas cu 10 % di e clientenan. ECT ta tuma luga bou di anestesia y manera tur anestesia por spera efectonan secundario. E efectonan secundario di anestesia ta poco comun y awendia nan tambe bon tratabel durante e sesion. Efectonan secundario serio di ECT ta poco comun y posibelmente menos comun cu e efectonan secundario di medicamentonan.
Desde 1938 ta aplica ECT. For di principio, naturalmente, tabata tin hopi cambio y mehoracion pa por a yega na e momento actual ( 82 aña despues) na unda cu e tecnica ta completamente controla cientificamente. Dokternan a cuminsa cu ECT na 1938 despues cu nan a ripara cu pacientnan psikiatrico tabata sufri hopi menos di epilepsia
Nan a cuminsa purba pa lanta episodionan epileptico cerca hende uzando diferente substancia manera por ehempel cu insulina y kamfer. Esakinan a trece hopi efectonan secundario te ora a pensa pa stimula un episodio epileptico mediante un shock electrico leve. Rapidamente a descubri cu hopi di e disturbionan psikiatrico tabata mustra mehoracion despues di a crea den un episodio epileptico.
Durante tratamento di ECT e cliente ta den e sala di operacion. Eynan e ta bou di anestesia cu un relahante muscular. Ta duna e cliente shocknan electrico hopi leve via su craneo den su celebro.. Esaki ta causa un episodio epileptico cortico cu tin su efecto curativo ariba por ehempel e depresion. Un session asina ta tuma luga dos biaha pa siman. E cliente ta pasa un rato hopi cortico den e sala di operacion y su recupercion ta bay hopi lihe. Den exterior un ECT ta tuma luga policlinicamente, despues di e recuperacion e cliente por bay su cas bek y den caso di un recuperacion suficiente e por bay bek su trabou.
Durante e ultimo 20 añanan clientenan di Aruba mester a biaha pa Corsou pa tratamento di ECT. Na Corsou den e sala di operacion di e hospital bieu St. Elizabeth psikiatranan di MaatschapPsychiatrie tabata duna e terapia di ECT. Nos clientenan di Aruba tabata keda interna den PAAZ di e hospital pa mas of menos 6 siman. E psikiatranan di e ECT di Corsou, Frans Heytelman y Glen Matroos, semper a duna un calidad hopi halto di trabou. Clientenan di Aruba cu tabata bay den mal condicion mayoria biaha tabata bin bek recupera. E baymento Corsou den un condicion asina malo y sin e sosten di famia, semper tabata un peso hopi grandi. Tambe e wardamento pa bo turno pa bin na remarca pa e tratamento tabata pisa pa nos hendenan.
Actualmente den un colaboracion entre AZV, cu cooperacion di anestesistanan Dr Posner y Dr Alders y e acercamento constructivo di e director di IMSAN Dr Joel Rainherc y su team hopi profesional, a crea e posibilidad pa Respaldo inicia cu e terapia di ECT na Aruba mes.
E crisis di Corona a postpone e yegada di e aparato pero e la yega diabierna 19 di juni 2020. Respaldo tin 4 psikiatra den servicio cu experiencia amplio cu ECT. Un psikiatra nobo, Sra dr. Tamara Falconieri, ta lidera e proceso y tres otro psikiatranan lo reemplase ora ta necesario. E anestesistanan di IMSAN tambe tin exeriencia cu e tecnica nobo aki. Tur protocol necesario pa garantisa siguridad di clientenan ta traha y ta “in place”.
Despues di yegada y instalacion profesional di e aparato di ECT, e momento a yega pa incia e adicion nobo y valioso pa psikiatria na Aruba.
Lo por dura algun luna mas prome cu e prome sesion por tuma luga, pero cu e ta bay cuminsa awo ta sigur. Den futuro cada aña diferente cliente lo beneficia di e terapia aki y lo sufri menos tempo di nan deprecion of otro disturbio.