Ciudadano preocupa a bati alarma na momento cu a tuma nota di un kite surf color oraño den lama bruto parti pariba di nos isla. A ripara cu e surfer tabata bay mas y mas leu cada rato.
Esaki a tuma luga den careda di 4:45 pm na altura di Sero Colorado, Punta Basora, caminda e lighthouse ta situa, cu un persona a tuma nota di un kite surf na un disctancia inusual. Mientras a tuma contacto cu autoridad, e kite surfer aki a bay mas leu ainda y a cuminsa tuma direccion zuid.
Polis a presenta y en berdad a constata un kite surfer den awa y tabata mustra di ta den problema. A bati alarma mesora y a cuminsa un buskeda. Na costa por a tuma nota cu a perde e surfer for di bista den e awa grandi ey.
Helicopter y wardacosta tambe a drenta den accion pero informacion te na e momento aki, cu no a logra localisa e kite surfer aki.
Na tera a cuminsa busca si tin cualkier familiar of amigo presente na e boca acostumbra pa e surfernan, pero ningun hende tin informacion. Locual a bisa, cu nan a constata hopi biaha cu ta bin surfers di costa di Venezuela te cerca nan den e area di Boca Grandi. No ta descarta cu esaki por ta un di nan.
