E hecho cu hotelnan y restaurantnan den vecindario a bati alarma diasabra anochi y un ekipo di 24ora.com a bay constata na e sitio cu berdad tabatin hopi awa saliendo y mandando un holor masha stinki mes den e area, toch awe Dienst Openbare Werken (DOW) a opta pa sali afo awe pa sigura cu e awa cu nan a manda lama diabierna anochi, no tabata awa di riool sin procesa. Tocante e holor stinki no a menciona nada, solamente cu esey mas bien ta awa para di awasero.
E hecho cu un rapport di CARMABI cu a sali den publicidad recientemente ta menciona cu lama den e area ta contamida door di bacterianan saliendo di Bubali Plas, tampoco no a menciona den e relato di prensa. Den dicho rapport ta bay mas leu di menciona cu di cada mil hende cu drenta lama eybanda, 32 ta bira malo. Un ke otro tin di habera cu e realidad cu e planta di purificacion ta bieu, obsoleto y cu mester drech’e of cumpra un nobo urgente.
Bubali Plas
Bubali Plas ta un saliña (wetland) mescos cu e saliñanan dilanti di hotelnan. Pa añas e saliñanan ta un punto mas abao y cu ta colecta awa di yobida prome cu bay lama. Den añanan setenta a construi un planta di purifacion na Bubali. E awa procesa ta bay den e saliña y e saliña den transcurso di añanan a crece bira Bubali Plas cu nos conoce awe. Bubali Plas a trece hopi vegetacion, pisca y ta atrae hopi especie di parha. E habitat na Bubali Plas a cambia di un saliña pa un awa permanente y cu esaki tin un biodiversidad mas diverso y consistente. Pa mantene Bubali Plas ta rekeri un bon nivel di awa continuo den e plas. E nivel di awa den Bubali Plas mester ta sostenibel den temporada di awasero y secura.
A traha un sluis pa laga awa bay
Pa e motibo aki mes den e periodo di 2000 pa 2005, DOW a traha un canal pa saca e awa y tambe a pone un sluis den e canal pa por garantisa un nivel minimo di awa y un nivel maximo na unda no ta molestia e vecindario. Tambe e sluis mester preveni entrada di awa di lama den e plas ora di lama halto.
Desde cu a instala e sluis e procedura standard pa habri e sluis ta como lo siguiente:
- Ora ta spera hopi awasero. pa por crea un buffer, dependiendo riba e nivel di awa na e momento ey
- Ora tin un nivel di awa cu ta surpasa e nivel maximo y ta molestia e bario di San Miguel y Keito
DOW ta sigura comunidad cu ora habri e sluis, cu esaki ta un standard procedura di basta tempo caba y ta sigura cu e no ta dañino pa medio ambiente ni pa e beachnan. Den temporada di secura, pa por sigui mantene nivel di awa di e plas, ta deposita awa procesa di RWZI Bubali den Bubali Plas.
Hopi awasero acumula
Durante di dos mita di 2021, Aruba a conoce un temporada di awasero mas largo cu normal y esaki combina cu algun otro factor, a contribui na hisa e nivel di awa den e plas cu mas frecuencia cu normal. Esaki a yena e saliña y Avenida Nelson O. Oduber cu awa cual a crusa causando molester na e barionan di San Miguel y Keito cu mas frecuencia. Pesey ta habri e sluis cu mas frecuencia tambe pa alivia e barionan concerni.
No ta manda awa di pos pa lama
A pesar cu RWZI Bubali tin su retonan tecnico, DOW no ta opta, na ningun momento, pa manda awa di riolering sin procesa pa lama via di Bubali Plas. Esey simplemente no ta berdad. Ademas, Bubali Plas tin un funcion di procesa e awa na un manera natural por medio di e matanan cu tin den e plas.
Un otro reto cu DOW tin adicional ta, cu awor tin un bloei di waterhyacint y esaki ta ocasiona un overlast ora nan tapa e plas y ta muri, cual tambe ta afecta e calidad di awa den e plas. Un danki na Fundacion Parke Nacional Arikok cu dentro di poco lo cuminsa kita nan.
Por ultimo, DOW ta reitera cu DVG y DNM ta tuma muestra continuamente den lama na e boca di canal, pa por midi e awa riba calidad di bacteria. DOW a sigura cu e situacion ta bao di control y pronto lo cuminsa cu inversion nobo den e planta pa mehora su capacidad y stabilidad.
