“Unda cu nos yiunan di tera ta haci bon papel, eynan nos ta”, ta un frase cu Headlines Group, esta e cas editorial di 24ora.com y TREMPAN ta kere den dj’e y ta aplica tambe. E siman aki a nota cu un yiu di tera, Nicole Acosta a termina su estudio riba nivel di bachelor como partera na Madre Patria Hulanda.
Acosta tin 26 aña di edad, despues di termina Colegio Aruba na Aruba, el a sigui cu su estudio avansa na Hulanda. E no a cuminsa di biaha den e estudio di partera. Prome cu el a cuminsa su estudio como partera, el a haci un aña como Verpleegkundige, claro, riba nivel HBO. Su soño semper tabata pa bira un partera. Debi, cu anualmente, Hogeschool Rotterdam ta acepta solamente 60 studiante pa sigui e estudio, el a hay’e obliga ta warda un aña. mientras e ta warda riba e proceso di aplicacion.
Den e siguiente aña, el a bolbe purba su suerte. Den casi 800 persona cu a aplica pa haci e estudio, el a logra di ta den e 60-nan pa por sigui e estudio.
“E ta un estudio basta intensivo”, Acosta a comenta durante un combersacion cu ne. E ta carga cu experencia y ta cla pa traha, por lo pronto no na Aruba. El a haci su pasantia(stage) na diferente organisacion, pa cual ta hacie un persona carga cu conocemento y experencia.
Na Hulanda el a haci su pasantia na; Reinier de Graaf na Delft, Haga Ziekhuis, St. Antonius Ziekenhuis na Utrecht y St. Franciscus Gasthuis na Rotterdam. El haci su pasantia na Aruba tambe na Cas di Partera, Amare Midwife Practice y Futuro Bambino. Pa awo, e lo aplica su conocemento y experencia na Hulanda mes, tin tur indicacion cu e lo ricibi un trabou na Den Haag. E tabata un momento masha bunita ora el a ricibi su diploma, den presencia di su mama, tata y su pareha
