Durante un encuentro cu prensa Rose-André Edoard a gradici tur esunnan cu a yuda pa haci autopsia cu curpa di su yiu, haya sin bida den un cel na warda di Polis na Shaba. Y el a haya poco claridad con su yiu a fayece. “Mi kier gradici tur esunnan cu a yuda mi pa haci autopsia cu autoridadnan di Aruba no kier a coopera cu ne.”
Dia 24 di october ultimo, polis durante un control a bin topa cu e detenido Michael Pequero Valdes, di 16 aña, sin señal di bida. E momento ey, e tabatin ocho dia cera na Warda di Polis di Shaba.
E encuentro cu prensa a tuma luga den presencia di abogado di e famia mr. Desiree Croes y e Patologo Forensico Clinico Frank van de Goot, kende a bini di Hulanda pa haci e trabou aki.
Famia a haya cooperacion di dr. Horacio Oduber Hospital pa dr. Van de Goot haci e autopsia eyden mes, diamars ultimo. Awo cu tur cos ta cla famia ta cla pa haci entiero di e hoben.
E mama a enfatisa cu su peticion pa haci autopsia tabata pa e haya claridad, pa sa kico a pasa cu su yiu. Pero lamentablemente a nenga tur peticion. “Finalmente mi abogado a logra trece e dokter pa haci e autopsia. Y esaki ta danki cu e ayudo cu a ricibi di pueblo. Danki na boso tur cu mi a haya claridad di con mi yiu a haya su morto den e cel na Shaba,” e mama a duna di conoce.
Abogado di famia di su banda a bisa cu “pueblo si a duna cara na e mama aki y danki na nan cooperacion por a trece e Patologo Forensico Clinico for di Hulanda y den forma priva e autopsia a tuma luga”.
Y el a agrega cu “nos a haya contesta riba cierto preguntanan. No tur. Pero nos sa tambe cu e mucha no mester a keda asina hopi den cel. Nos sa cu un dia prome a bisa e mama bin busca su yiu y toch el a keda despues mas cu 24 ora cera. Pa nos ta hopi importante pa nos haya un claridad completo di loke a pasa,” Abogado Croes a expresa.
Cu aprobacion di e famia di Michael Pequero Valdes, e Patologo por a duna informaciondi kico a pasa cu e hoben. El a sigura di no a haya señal of marca di resistencia (den lucha cu otro hende) door di pelea of otro lesion. Esey ta pa loke ta e parti pafo di e curpa.
Na su garganta a haya señal cla di horcamento. E tin un marca basta hancho rond di e garganta, di aproximadamente 5 cm. “E ta fit perfectamente cu e uzo di paña di cama pa comete e echo, manera a bisa e famia inicialmente.
Tambe a haya otro señalnan cu ta presenta na momento cu un persona horca su mes. “Mi por sigura, cu mi prome opinion aki, cu e resultado preliminar ta consistente na horcamento. Y tur cos ta mustra, cu ausencia di cualkier indicacion di pelea, cu esaki a wordo haci door di e hoben mes.”
El a bisa tambe cu falta algun cos ainda pa studia den e resultado final pero no ta kere cu e lo trece cambio den e conclusion principal cu aki ta trata di un caso di suicidio. “Mi ta hopi sigur cu e causa di morto ta cu el a stik muri, pero e motibo tras di e horcamento mes ta un storia completamente diferente.”
Su opinion di e caso aki ta cu e echo ta un cos cu nunca mester a sosode.
