Diahuebs ultimo Naomi Vrolijk y Jeremy Boekhoudt a haci un donacion grandi di co’i hunga na Hunga Teca. Originalmente e pareha lo a tene un “toyrun” pa Hunga Teca durante e International Half Marathon na September, bao di e lema cadakmtaconta. Nan a prepara tur cos, incluyendo nan T-shirt den cua nan lo a core.
Desafortunadamente a cancela e evento di Half marathon dor di e pandemia. Sinembargo, ya caba e pareha a logra acumula co’i hunga via nan amigo, famia, coleganan y alumnonan di Colegio EPI y EPB.
“Nos ta masha gradici na e pareha deportivo aki pa nan bunita gesto”, asina Yamila Hoevertsz-Kock, presidente di fundacion Hunga Teca a duna di conoce. Tur donacion ta mas cu bonbini y ta yuda den logra acumula mas material cu por sigui fia muchanan pa nan desaroyo.
Hunga Teca ta un organisacion na unda muchanan entre 0-12 aña por bira miembro manera un biblioteca pa co’i hunga y wega, pa solamente 5 florin pa aña. Nan ta situa den e edificio di YMCA na San Nicolaas y por lo pronto ta habri riba diahuebs merdia entre 3:30pm – 5:30pm pa nan clientenan.
Riba tur ultimo diaranson di luna, cuminsando diaranson dia 25 di November, Hunga Teca lo ta na luganan publico di hunga entre 3:30pm -5:30pm cu wega y informacion di e importancia di deporte y wega pa mayornan. Lo avisa na tempo unda lo bay ta.
Por haya mas informacion tocante e fundacion Hunga Teca door di subi nan pagina web www.hungateca.com. Tambe tin un pagina di Facebook y nan ta riba Instagram tambe.
