Dos siman pasa a sali for di Aruba rumbo pa Miami, un grupo di cinco polis di Cuerpo Policial Arubano, pa atende un curso y entrenamiento relaciona cu “Community Policing”. Ta trata aki di Elisa van Loon, Clarisca Velasquez, Rolando Maduro, Juan Bislip y Lysander Besselink. E prome parti di curso aki tabata unicamente teoria y a tuma luga na december di aña pasa. Awor e miembronan di Cuerpo Polical Aruba hunto cu nan coleganan di Corsou, Sint Maarten y di islanan BES, a conlcui e di dos parti di e programa intensivo aki.
E curiculo di e curso ta prepara door di Dr. Veronica Gonzalez, e associate director di Miami Dade College, School of Justice y e training mes tabata na encargo di Julio Blanco, kende ta e polis di bario (Neigborhood Resource Officer) di Miami Beach. E curso/training aki ta financia directamente for di fondonan disponibel a traves di e College van Korpschefs, forma pa e cuater hefenan di polis di Caribe Hulandes. Aki Altocomisario di Cuerpo Policial Aruba, Ramon Arnhem, hunto cu su demas homologonan ta discuti riba asuntonan di interes comun y necesidadnan cu nan cuerpo tin mester pa cu desaroyo di nan personal.
Wowo y horea
Pa loke ta trata e programa mes, mester bisa cu e polisnan cu a asisti na e programa aki, a topa cu hopi conocemento riba e area di trabou cu ta regarda Polis di Bario. Mester accentua cu e trabou di un Polis di Bario ta encera di ta e wowo y horea di su organisacion den comunidad. Su rol ta pa gana y crea confiansa den su bario pa trece e comunidad mas cerca di e organisacion di husticia. E filosofia tras di esaki ta, cu siguridad y combatimento di crimen no ta e tarea exclusivamente di Cuerpo Policial, pero mas bien e ta un responsabilidad di tur cuidadano.
Inversion den e hende
Altocomisario Ramon Arnhem a sigura cu curso y/of trainingnan manera esaki no a cuminsa y ni lo caba aki. Tin hopi otro curso y training cu a y ta tumando luga y tin hopi mas na caminda. Segun Arnhem, cu e ta completamente convenci, cu pa un organisacion por opera optimalmente, no unicamente e mester di ekipo, pero mas cu tur cos e personal mester ta bon prepara cu conocemento pa nan por traha mas eficiente y asina tambe brinda un miho servicio di loke cu ta brinda caba na nos comunidad.
“Pabien”
“Prome cu tur cos mi kier enfatisa cu mi ta hopi orguyoso di mi coleganan, cu nan a logra pasa e curso aki cu exito. El a exigi hopi di nan, banda di nan trabou regular. Nan mester a skirbi documentonan, haci investigacion, sigui cursonan y sin lubida participa na examennan practico. Boso a saca cara, pabien”, asina drs. Ramon Arnhem a expresa durante e ceremonia di entregamento di diploma diabierna ultimo na Miami.
Polis mas cerca di pueblo
Meta di e curso ta pa reenforsa un di e strategianan principal den Cuerpo Policial Aruba, esta “Community Policing”. Esaki ta encera un polis cu ta cerca di su pueblo y cu continuamente ta den contacto cu comunidad y partnernan den bario y di e forma aki ta tende y sa hopi di “kico ta come y bebe” den cada bario di nos isla. Cu e conocemento aki, Cuerpo Policial Aruba por sirbi e barionan miho, door di sa y conoce nan inkietudnan, kehonan y retonan specifico di e habitantenan.
Presente na e ceremonia di graduacion riba diabierna dia 12 di april 2024 na e Campus di Miami Dade College, tabata altocomisario di e islanan, esta drs. Ramon Arnhem, Alwyn Braaf, Carl John y Raymond Ellis. Tambe presente di parti di Miami Dade College tabatey e Campus President, Fermin Vasquez kende durante e ceremonia a hiba algun palabra.
E graduadonan
E graduadonan tabata e centro di atencion y a ricibi nan certificado for di man di e Director of School of Justice, Richard Clement. E graduadonan di Aruba ta Lysander Besselink, Juan Bislip, Rolando Maduro, Elisa van Loon y Clarisca Velasquez. E graduadonan di Corsou ta Glendon Aniceta, Sherwin Elizabeth, Clarson Gomez, Geraldine Isabella y Sharitte Pastor. E graduadonan di Sint Maarten ta John Boyrard, Jeriesha Jones, Jedward Martes y Sheron Richardson. Pa Saba (BES-eilanden) ta Rexcarlos Courtar.
Tocante Cuerpo Policial Aruba
986 y ta conta awendia cu mas o menos 600 polis trahando incansablemente pa brinda siguridad na nos pueblo. Ta trata aki di mas o menos 375 hende homber, 104 hende muhe y 120 empleado administrativo, trahando den 4 districto, cu ward’i polis situa na Oranjestad, San Nicolas, Noord y Santa Cruz.
Orguyosamente Cuerpo Policial Aruba ta conta cu hopi respet internacional, specialmente pa su unidadnan special manera “Motor Unit”, “K9 Unit”, “Rapid Response Team”, “Arrestatie Team”, “Mobiele Eenheid” y “Duik Team”, sin lubida e departamentonan conoci di patruya y recherche cu ta bon entrena y capaz pa investiga y soluciona e casonan di mas complica.
Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP.
