E fraccion di GroenLinks den Parlamento di Hulanda kier pa elimina XTC for di e circuito criminal y pa Gobierno regula su produccion. Esaki ta segun miembro di Tweede Kamer, Kathalijne Buitenweg den Volkskrant.
“Gobierno no mester administra e pildonan su mes, pero nan mester por tuma e control si.”
Buitenweg ta bringa pa un sistema di permiso, caminda por controla e produccion, pa asina por tin pildonan disponibel solamente si nan ta cumpli cu e exigencianan di calidad. “Mi ta bisa esey pa e salud publico pero tambe pasobra nos tin cu haci algo contra e poder cada bes mas alarmante di criminalnan.”
Tambe e alcalde di Breda, Depla (PvdA) ta argumenta den e corant riba un cambio den e maneho di droga: “Duna mi un rason pakico alcohol ta disponibel di forma liber y XTC mester ta prohibi. Mi ta bisa na e expertonan, cu ta bisami: XTC ta haci menos daño cu alcohol.”
Organisacion Mundial di Salud
Buitenweg kier pa Hulanda tuma e iniciativa pa revisa e convencionnan di Nacionnan Uni riba droga. Segun cu e ta bisa, e organisacion Mundial di Salud a bisa recientemente cu clasificacionnan mester wordo revisa. Buitenweg ta haya cu e gobierno Hulandes mester tuma e momento di busca apertura den e “discusion tranca.”
“Nos mester analisa honestamente loke e tratadonan aki a trece pa nos. Reduccion di e uzo? Reduccion di crimen? Mi no ta kere.”
Buitenweg, ademas di e regulacion, tambe lo mester bin un maneho di desaliento y informacion riba e riesgonan di XTC.
Den Tweede Kamer no tin sosten pa e plan di GroenLinks
VVD ta pensa mas riba mas poder pa control policial. Miembro di Tweede Kamer Laan: “Ta bon cu GroenLinks ta pensa riba e delitonan grave di droga, pero esey bo no ta haci door di legalisa su comercio.” VVD ta sigui pensa riba un solucion, segun Laan. “Pero nos ta papiando riba droga, esey no ta nada inteligente,” segun Laan.
Miembronan di coalicion CDA y Christen Unie tambe a reacciona di forma negativo. “Si nos ta bay bende XTC den e pais, e ora nos ta hopi leu for di cas. XTC ta un producto peligroso,” segun lider di CDA Buma.”E pildo ta prohibi mundialmente, si Hulanda haci un excepcion, realmente nos ta riba e caminda robes.”
“E ta un desaster. E Gobierno no mester bay deal,” asina Lider di Christen Unie, Segers, a bisa, “Bo no por bisa di un banda cu e ta peligroso, pero si di un otro banda ta facilit’e como Gobierno.”
Di loke ta e partidonan na mando, D66 ta haya solamente cu e ta un idea simpatico, aunke e partido ta realisa cu esaki no ta cu “haalbarekaart.” E Democratanan ta na ora pa e legalisacion pero “nos sa cu den Tweede y Eerste Kamer no tin un mayoria. Banda di esey, mester tin mas conocemento riba regulacion di droga riba mesa, prome cu cuminsa forma conclusion,” miembro di Tweede Kamer, Bergkamp, a bisa. “Danki Dios awo nos ta hayando experiencia den e regulacion di weed, nos por hiba e conocimento y experiencia aki cu nos den eventual plannan nobo pa por regula e droga.”
Partido di oposicion PVV ta opone ferosmente contra legalisacion di XTC. “Tin ocho morto pa aña cu XTC como principal causa di morto: esakinan ta hoben, cu nan bida ta wordo kita for di nan, e por ta boso yiunan. Nunca a huma of bebe, pero toch morto,” segun Fleur Agema di PVV a bisa na NOS.
