Tabatin masha hopi expectativa awe pa e reunion di Presupuesto di Ministerio di Salubridad Publico, Turismo y Deporte awe. Manera ta conoci, e reunion no a continua diabierna anochi despues cu a presenta un discucion riba e tema di Marihuana entre Hendrik Tevreden (MEP) y Ricardo Croes (RED). Como cu Marisol Lopez-Tromp (POR) a opta pa no presenta diabierna y ora cu Ricardo Croes a rabia y bandona sala, coalicion cu normalmente ta conta cu 12 miembro, tabatin solamente 10 miembro den sala di Parlamento, cu ta menos di e 11 cu ley ta prescribi. Consecuentemente mester a pospone e reunion pa sigui awe.
Aunke cu den fin di siman a tuma luga varios reunion interno den coalicion, toch ta obvio cu ainda no tur asunto ta regla. Marisol Lopez-Tromp entodo caso si a presenta awe na Parlamento manera “nad’un pasa” mientras cu Ricardo Croes a yama trempan awe dialuna pa “meld ziek”. Consecuentemente coalicion ta habri siman awe cu solamente 11 miembro den Parlamento cu ta pone cu ningun Parlamentario por bay cas trempan awe of atende otro compromiso, pasobra e reunion lo para sigur.
E forma con e discusion a bay diabierna anochi publicamente den Parlamento awor ta rekeri un proceso di reconciliacion. Sea MEP ta para tras di Hendrik Tevreden y causa problema den coalicion of ta para tras di Ricardo Croes pa continuacion di coalicion pero ta confronta un problema interno e ora cu Hendrik Tevreden. Ta hopi obvio cu den e bataya aki, un di e dos Parlamentarionan aki lo mester perde cara.
E posicion di Ricardo Croes awe ta obvio, demostrando su partnernan den coalicion cu e no ta presenta awe. Probablemente e lo desea pa MEP manda un mensahe cla, manera cu el a pidi diabierna den e reunion publico, riba kico ta posicion di Minister Dangui Oduber relaciona cu legalisacion di marihuana medicinal. Tambe e Parlamentario cu mas voto den Parlamento, esta Ricardo Croes, a presenta un mocion di cual ni POR ni MEP no a sostene y como tal lag’e pasa un berguensa den pleno reunion di Parlamento. Probablemente e humiyacion ey tampoco e no lo kier acepta, pa cual awe e ta demostra su poder dor di keda sin presenta pa yuda “forma quorum” pa coalicion por sigui atende cu tratamento di presupuesto 2019.
E agenda nobo aki di Parlamento, relaciona cu tratamento di presupuesto ta pone henter e sistema bou un presion inmenso. Diahuerbs awor ta programa pa keda cla cu tratamento di presupuesto pasobra reces di Parlamento ta cuminsa y varios Parlamentario a anuncia caba cu nan lo biaha cu vakantie. Riba dje ainda no ta scuchando nada di tratamento di e reforma fiscal y e ley di LAFT cu tambe lo mester pasa den Parlamento prome cu canta Dande e aña aki.
