Tur cos ta mustra cu suspension a cay na Dienst Technische Inspectie (DTI) situa na Barcadera. Anko Koopmans, Director di e departamento no kier bisa nada ainda. El a splica nos redaccion cu ainda e no por duna informacion riba e caso specifico aki. Mas bien a confirma cu tin un investigacion andando y cu e siman aki ora ta asina leu, lo splica si ta necesario. “E calidad di keuring di auto ta importante pa nos” segun e director Anko Koopmans y nan ta haciendo tur esfuerso pa logra esey.
Mientrasanto informacion cu a yega na nos redaccion ta indica cu algun trahado femenino entre otro a basha abou. Tambe nos ta hayando informacion cu pa algun tempo caba tin sospecho di iregularidad tumando luga. Ta keur auto sin cu esaki ta yega na DTI. A cambio di placa ta keur e autonan y traha e papel sin cu e vehiculo a bin pa keur. E modus operandi aki no ta algo nobo.
Hopi aña atras tin trahado cu a perde nan trabou pa e mesun actonan. Awor aki a mira cu atrobe e rumornan tabata coriendo y pesey a cuminsa investiga. A yega asina leu cu net prome cu weekend e suspension a cay. Ta menciona cu ta sospecha e empleado di inicial R.C. den e caso specifico aki.
Ta papia di algun vehiculo di un compania di tour cu a haya documento di goedkeuring sin cu e vehiculo a presenta na DTI. Probablemente e vehiculonan lo no a pasa un keuring si nan a bin DTI. A uza e forma mas facil y ilegal pa yega na e keuringskaart di e vehiculonan. Posiblemente ta paga bou mesa pa esaki por tuma lugar. No ta conoci si Landsrecherche tambe lo cay aden of si directiva di DTI lo cana e caminda via Departamento di Recurso Humano pa tuma e accionnan necesario.
