Fundacion Diabetes Aruba tin un programa di 12 siman di actividad fisico pa persona cu diabetes tipo 2, y esaki ta tur diasabra cumisando 20 di april te cu 6 di juli. E programa ‘Move cu Diabetes’ ta tuma luga na Cacique Macuarima School Santa Cruz, for di 7:30 di mainta te cu 9’or di mainta pa solamente 75 florin. E suma aki ta encera cu na momento e participante yega na 80% di e 12 siman aki, nan ta haya e suma aki bek. Ta invita cada persona cu tin diabetes tipo 2 pa participa pasobra e meta ta pa stimula actividad fisico como parti di e maneho di diabetes, eynan mester pensa riba actividad fisico hopi visibel y cosnan cu bo por haci na cas mes sin ningun material specifico.
Charlene Leslie ta coordinado di proyecto pa Fundacion Diabetes Aruba anto e ta splica cu como fundacion den colaboracion cu fundacion Movimento ta Bida nan ta presenta de di dos ciclo di Move cu Diabetes. Esaki a cuminsa na luna di januari cu e prome ciclo, y diasabra 20 di april ta sigui cu e di dos ciclo.
Actividad fisico tin efecto directo como tambe indirecto riba maneho di diabetes unda cu indirecto ta pensa si haci mas actividad fisico, mas e lo tin efecto ariba e peso, cu mas actividad fisico y uza mas energia por reduci of mantene e peso cual tin efecto positivo riba maneho di diabetes. Na otro banda, mas actividad fisico haci lo tin efecto positivo tambe riba e funcionamento di insulina den curpa pa tuma e sucu mas miho den celulanan. Actividad fisico, banda di diabetes, pa cada persona ta hopi importante.
Pa registra, por tuma contacto of cu fundacion Diabetes Aruba of fundacion Movimento ta Bida, riba number di telefon 586 8651, 594 2546, por mail riba [email protected] of [email protected], y por tuma contacto riba medionan social tambe riba paginanan di Facebook. Link pa registra online ta aki: https://forms.gle/3H6byxcKMPb6XATo9
