Diadomingo ultimo, nos a acudi na Aeropuerto Internacional Reina Beatrix pa despedi di cuater (4) chef, un (1) docente y un (1) miembro di staf di Colegio EPI cu lo a biaha pa Den Haag, Hulanda. Durante un siman, e team di cushina di Colegio EPI a acudi na ROC Mondriaan pa siña e sistema nobo cu tin riba nivel di MBO 3. Nos a topa cu nan na Hulanda pa asina mira con esaki a bay y kico tur nan a experiencia cu lo ta treciendo bek pa comparti cu coleganan na Aruba.
Andres Geerman, coordinador di e management team na Colegio EPI ta conta nos cu e biahe aki tabata un culminacion, pasobra tin casi seis aña trahando riba e proyecto di renoba enseñansa na Aruba. E biahe aki tabata ta pa cera e circulo di e cambionan cu ta haciendo na Aruba. “E ora mi a trece hunto cu mi cuater chef cu ta cushina cu e muchanan tur dia, tambe hunto cu un instructor di teoria, y ami a bin como directie lid,” Geerman ta splica. Dus fuera di haci cushina, Geerman a haci proyecto pa otro unidadnan di EPI. E proyecto su meta ta pa engrandece mundo culinario na Aruba. Nan a topa varios ex alumno cu ta haciendo nan carera na Hulanda, algo hopi great pa experiencia.
“Mi mes ta coordina e oficina internacional di EPI y nos por bisa cu e ultimo aña aki nos a manda te aworaki diescuater mucha afo”, segun Geerman. Otro aña lo ta mandando shete alumno mas pa Hulanda y EPI ta haci intercambio regular. Geerman ta conseha cu tur hende cu por haya chens di experiencia algo of biba afo pa haci esaki, pasobra ora bo bin Aruba esaki ta yuda bo amplia bo base. E industria na Aruba ta hopi duro, semper nan ta bisa cu bo no tin e capacidad.
Na Colombia tambe tin e oportunidad awor pa exporta e conocemento cu tin na Aruba cu otro paisnan tambe cu ta sondea pa engrandece nan zona hotelero, segun Geerman esaki ta un realidad caba. Aña pasa a manda un studiante pa cuater luna na Irlanda, y awor e tin un oferta di trabao pa traha eynan pa un aña y mey.
Kiermen hopi biaha den e industria aki cu ta habri, tin ora nos no ta ripara e balor di e industria hotelero cu careranan afo. “Nos ta contento pasobra hopi biaha e muchanan ta keda, nan ta kies y tin nan famia, spera bo ta spera nan bay bek Aruba y yuda. Nos no por kies Hulanda si, nan MBO level ta traha pa Hulanda y no pa exporta. Aruba ta net otro forma, e muchanan cu nos tin ta tur parti di mundo,e luga ta habri y bo tin cu traha pa haci e internacional.”
Geerman ta bisa cu esey si ta haci un problema, pasobra Hulanda ta diseña pa bo traha eynan no pa bo bay pa Aruba of internacional. Un Rubiano por haya su mes cualkier parti di mundo.
Sistema bon structura
Oscar Steba, chef instructor na EPI ta bisa cu e bishita na Hulanda ta hopi positivo pa conoce e sistema di ROC Mondriaan. Un sistema cu ta bon pero di otro banda Aruba tambe tin su sistema cu ta kico por trece bek na Aruba cu por drecha aki aya y pa haci programa mas miho. “Den e concepto cu e ta conecta cu nos mercado laboral,” segun Steba.
E facilidad di Hulanda ta toch basta grandi, cu cuater cushina y un banquet kitchen, y asina tin otro cushina cu ta haci sandwich y e cosnan asina. Basta amplio, bon ekipa, cu hopi studiante cu ta atende e scol. E sistema ta hopi bon structura. Na Aruba e sistema ta duna oportunidad caba p’e hobennan gradua y bira profesional culinario den e hotel- y restaurantnan na Aruba. Na Hulanda sigur ta bon structura tambe pero ta ambos Aruba y Hulanda por siña for di otro segun Steba ta splica.
E sistema Europeo cu Mericano ora ta trata nan base esaki ta mescos. Locual bo tin cu haci ta traha cu e sistema nobo cu companianan afo, caminda nan tambe di nan parti mester ta miho prepara pa ricibi e studiantenan pa envolvi nan mas miho riba field. Pa e Rubianonan, e idioma di instruccion bo por traha cu ne sea ta Ingles of Hulandes pero den e sistema aworaki na Aruba bo ta haya hopi e parti Latino.
Akinan mester cambia e Hulandes pa e parti Ingles y esey ta caminda ta bezig cu nan pa traduci e buki completo na Ingles pa uza esaki na Aruba. E ta un reto grandi, y p’e motibo aki nan ta bishita ROC Mondriaan pa pasa mas hopi informacion posibel p’e studiante segun Steba.
Ta gradici AHATA
Tisa LaSorte, CEO di Aruba Hotel And Tourism Association (AHATA), a indica cu e trabou culinario ta un di e trabounan mas dificil pa bo haya na Aruba. AHATA ta purbando di basta tempo caba pa yuda e scolnan culinario pa atrae mas studiante, pero tambe pa hisa e nivel di educacion culinario na Aruba. AHATA a aporta pa e docentenan culinario di EPI por biaha Hulanda pa mira entre otro, con nan ta duna les eynan, mira kico ta nan curiculo y con e cushina ta.
Directora general di Colegio EPI, Ankie Danker na salida di e delegacion a indica cu nan ta contento cu team di cushina di Colegio EPI ta biahando pa asina siña di e estudio nobo cu ta biniendo. Tin varios desaroyo y ta importante pa e chefnan bay den exterior pa siña mas. E delegacion ta consisti di chef Alvin Leest, Oscar Steba, Fernandi Nuñez y Calvert Cilie.
