Djaweps 4 i djabierne 5 di oktober Ministerio Públiko (OM) a organisá pa su trahadonan den kuadro di Learning & Development (Enseñansa i Desaroyo) i Team Building un evento di dos dia. Koleganan di islanan BES, Sint Maarten, Aruba i Korsou tur a bini huntu.
Djaweps 4 di oktober tabata tin pa promé biaha e Academy di OM na Korsou. E promé dia tabata den kuadro di Enseñansa i Desaroyo. E programa di mainta a kuminsa ku un charla di e sikólogo Micha van de Vorst. Den un forma interaktivo e la trata e tema di kon pa maneha situashon nan fuerte i violento ku bo ta topa den trabou. Restu di dia koleganan por a atende diferente workshop.
Por a skohe den workshop nan dirigí riba desaroyo di konosementu hurídiko of desaroyo personal. Tabatin sufisiente espasio tambe ku koleganan por a konose otro mas mihó. A sera e dia ku un aktividat di teambuilding kaminda ku koleganan por a demonstra nan talentonan musikal na un manera chistoso i interaktivo.
E siguiente dia e reunion di Parkèt grandi (GPV) a tuma lugá. GPV ta un evento annual kaminda tur kolega di OM den Karibe ta bini huntu pa trata un tema spesifiko. E aña aki a toka turno na e tema di Integridat. Den e trabou di OM, integridat ta un tema ku ta para sentral i ta di gran importansia ku koleganan por trata e tema aki huntu i siña kon pa atende ku kuestion nan di integridat.
Parti merdia tur kolega a traha huntu den un seshon kreativo na diferente pintura ku na final a forma kuater diferente kuadro. E kuadronan a ilustra karakteristiko di e diferente islanan. Esaki sigur a kontribui na e kolegialidat di tur e partisipante nan. A sera e dia ku un brindis huntu ku tur kolega ku a partisipa.
Ministerio Públiko por mira tras na dos dia edukativo i eksitoso.
