Minister Wever tin tur autoridad: Presion awo ta riba N.V. ELMAR pa baha tarifa

Minister di Asuntonan Economico, mr. Geoffrey Wever, a bisa ayera cu e compania Naamloze Vennootschap Electriciteit-Maatschappij Aruba “ELMAR” mester tuma un decision urgente riba e tarifa di coriente pasobra awo nan ta actuando contra nan concessievoorwaarde. E mandatario a critica cu a acorda cu por a aumenta tarifa pa seis luna so y esey a vence. Na februari ultimo caba mester a baha prijs. AHATA y ATIA a taha Gobierno di trempan y a copia WEB y ELMAR den e comunicacionnan y hasta a bay den prensa. Ambos compania, incluyendo gobierno a opta pa keda den silencio y ignora gremio comercial.

Pero ta parce cu awo tin cambio. E minister encarga cu asuntonan economico a sali publicamente y demanda pa bin un solucion y e siman aki! Politicamente ELMAR ta resorta bou di Ministerio di Energia pero, pa loke ta tarifa di coriente y e permiso pa hisa of baha ta mara na Ministerio di Asuntonan Economico y no bou maneho di Ministerio di Energia.

Naamloze Vennootschap Electriciteit-Maatschappij Aruba (Elmar) ta existi pa mas di 70 aña caba y ta conta cu un total di 165 empleado den servicio directo di e compania. Su contract di distribucion di coriente firma cu Gobierno di Aruba ta vence dia 15 di februari 2026. Entre aña 1923 pa 1930, e rumannan A.J.P. y J. van Meeteren tabata percura pa generacion y distribucion di coriente pa Oranjestad. Nan planta tabata situa den Windstraat. Na aña 1931, John G. Eman a haya e concesion pa bende coriente durante 25 aña pa Oranjestad y vecindario. Na aña 1950, a bende e compania cu Nederlands-Indische Gasmaatschappij, cu despues a bira Overzeese Gas- en Elektriciteitsmaatschappij N.V. (OGEM), cu tambe a ricibi un concesion pa cincuenta aña.
E suministro di coriente a pasa na november 1950 pa e compania, e tempo ey recien estableci, N.V. ELMAR, cu OGEM como accionista mayor y gobierno como accionista minoritario. Despues di aña 1964, N.V. ELMAR a limita su mes na distribucion di coriente y a cera un contract di produccion cu WEB Aruba N.V. Cu tempo, OGEM a bay bancarota y e maneho di gobierno pa tin mas control riba companianan di utilidad tabatin como resultado cu na aña 1990 Gobierno di Aruba mes a cumpra tur e accionnan di N.V. ELMAR. Pa evita metemento di politica a funda Utilities Aruba N.V. na juli 1990, cu a bira cumpra e accionnan di Gobierno y a bira doño di tanto ELMAR como WEB.

E ley corespondiente, conoci como e Elektriciteitsverordening ta indica claramente cu Minister di Asuntonan Economico tin tur autoridad ora ta atende cu prijs d coriente. Articulo cinco inciso un ta papia di “Onverminderd het in artikel 2, eerste lid, bepaalde mogen slechts werken worden uitgevoerd, op het ontwerp waarvan goedkeuring van de minister van Economische Zaken is verkregen. Het verlenen van de vergunning houdt niet in de goedkeuring van het ontwerp door de minister van Economische Zaken.”

Glenbert Croes, e actual minister di Labor y Asuntonan Social di nos pais, tin 55 aña di edad. Den eleccion di aña 2013 el a logra haya 2366 voto individual. Den eleccion di aña 2017, el a subi un poco y a yega 2491. Sinembargo, awo cu el a haya chens pa demostra su mes atrobe den gobernacion, su votonan a baha cu 22% y alcansa no menos di 1929 voto riba su nomber. Den pasado Croes a funda su mesun partido OLA y a forma mas di un gobierno cu partido AVP e tempo aya. E mes a ocupa e puesto di minister y parlamentario. Glenbert Croes ta casa y tin dos yiu muhe.

Den e ley conoci como e “Prijzenverordening” tambe ta duna Minister Geoffrey Wever e autoridad pa determina prijs, entre otro di coriente. Pues, legalmente, Minister Geoffrey Wever no mester di Minister Glenbert Croes pa dicidi riba tarifa di awa y coriente, sino e mes ta e minister reponsabel!

For di fuentenan di NV ELMAR a informa nos cu ambos minister ta robes. No por pone presion riba ELMAR pasobra no ta posibel pa bende coriente mas abou na e prijs cu ta haya for di WEB. Pues, en bes di purba pone presion den media riba ELMAR, e miho cos ta pa atende cu WEB pa nan baha e prijs cu ta bende cu ELMAR pa asina e ultimo aki por reduci nan tarifa na pueblo y na comercio.

mr. Geoffrey Wever a caba V.W.O na Colegio Arubano y despues a studia na VU Amsterdam, prome como notario y despues como fiscalista, pues den leynan di belasting. El a traha como abogado na bufete Croes, Wever & Tchong te na aña 2014. Despues el a cuminsa duna les na Universidad di Aruba den e facultad financiero-economico, riba derechonan comercial. Tambe den e facultad di ley y proceduranan civil. E tabata partner den e bufete di abogado De Cuba Wever Attorneys at Law. Na 2021 el a uni na e partido politico RAIZ y den su prome salida a logra no menos di 1430 voto individual.

Un otro fuente den ELMAR a sigura cu e presion ta bin di WEB pasobra nan ta bou presion di e institutonan financiero cu a refinancia e compania di produccion y distribucion di awa y coriente. Nan a bay hopi den cora y awo mester sali bek. Sinembargo, comercio ta sinti cu nan mester financia mal maneho den WEB cu a dicidi, a pesar di tabata consciente cu mester a aumenta prijs, pa politicamente no hacie na tempo cu consecuencia cu tur hende ta paga como 30% mas awe, sin cu ta necesario.

Mientras cu di un banda Minister Wever di Raiz a pone presion pa ELMAR dicidi e siman aki ainda, e Minister di Energia mes ta henter e siman aki ainda den exterior, cu entre otro e director di WEB y Utilities Aruba NV tambe. Ta duna e impresion como tal cu e siman aki un decision final lo no cay. E director di ELMAR no a biaha siman pasa cu e delegacion pa Spaña. 

Entrante 1 di januari 2021, Utilities Aruba NV ta nombra Anthony Irausquin como director di NV Elmar. El a studia na Hogeschool voor Economische Studies na Rotterdam (HES), despues na TIAS School for Business and Society y na VU Amsterdam den Business Administration and Management. El a traha na APFA, RBTT Bank Aruba, na Dr. Horacio Oduber Hospital como director di facilidadnan y desde januari 2021 ta maneha N.V. ELMAR. Ta prome biaha cu e ta ocupa un funcion di director di un compania.

Den pueblo ta lamenta tambe si cu, siendo a aumenta prijs cu 30% pasobra ELMAR ta bayendo malo, cu e director ta saca un Ford Mustang nobo hopi caro como su auto di compania. Nunca antes den historia un director di ELMAR a yega di stuur un auto asina costoso, demostrando cu su capacidad pa compronde “timing” y pa tin conexion cu su clientenan (pueblo), no ta existi!

Noticia relacionaMas for di e autor