Durante e ultimo añanan por a nota un aumento di e uzo di Utility Task Vehicles (UTV) y All-terrain vehicles (ATV) na Aruba, entre otro por medio di tour turistico. E aumento aki tin varios efecto negativo pa Aruba. E uzo di UTV’s y ATV’s a trece un aumento di accidente cu daño fisico y material, daño na nos naturalesa (flora, fauna y propiedad geo-morfologico), disturbio p’e ciudadanonan (zonido y stof) y obstaculo di e fluho di trafico.
Pa mitiga e impacto negativo di UTV’s y ATV’s riba hende, nos naturalesa, trankilidad, siguridad y fluho di trafico, Minister di Transporte, Ursell Arends, a tuma e decision pa no otorga permiso nobo den transporte publico pa UTV’s y ATV’s, y tampoco transferi permiso existente pa UTV’s y ATV’s. Asina ta pone un stop na e aumento di UTV y ATV den e sector di transporte publico.
Minister Arends a tuma e decision aki a base di conseho di e Werkgroep UTV/ATV cu ta consisti di e representantenan di DOW, DTP, DNM, DIP, DTI, KPA, DWJZ, DEZHI y ATA. E decision aki a keda formalisa den e Ministeriële Beschikking di 16 di maart 2023, publica den Landscourant di 24 di maart 2023, edicion number 7. E decision aki ta parti di un maneho mas amplio dirigi riba miho regulacion di UTV/ATV y reduccion di su impactonan negativo.
