Loke e pueblo ta gusta asina tanto y tabata warda riba dje ta diadomingo awo, dia 2 di april, riba parkeerplaats di Stadion Guillermo Prospero Trinidad. Entre 10:00 am y 6:00 pm ta spera un y tur pa pasa bishita e grandioso Fiesta Rotaria cu Rotary Club of Aruba ta
organisa pa di 40 biaha.
Durante un conferencia di prensa ofreci diamars mainta, president di Rotary Club of Aruba, Shelby Maduro a splica cu e evento, riba su mes, ta un tradicion pa hopi caminda mientras bo ta yuda otro, bo ta yuda bo mes tambe. Fiesta Rotaria ta un actividad cu, a traves di un grandioso bazaar y feria, ta recauda fondo cu ta bay completamente bek na diferente fundacion riba nos isla. E meta pa e aña’ki ta pa alcansa e suma di 400 mil florin!
Esunnan cu yega trempan ta bebe awa limpi for di e diferente stand cu tin manera esun di supermarket cu comestibel y esun di paña. Tambe tin stand cu gran variedad di mata y nada menos cu nuebe container cu articulo pa cas. Tur e articulonan aki ta bay na prijs di baca flaco cu no por keda sin probecha.
For di Luis Oduber, presidente di e comision organisado di Fiesta Rotaria por a compronde cu diversion tambe lo tin na granel diadomingo ya cu tin area pa mucha cu diferente entretenimento manera dino jump, carrousel y pintamento di cara. Bar y cushina lo ta bon surti durante henter dia cu pasaboca, cos dushi, fried rice cu sate, pasta cu garlic bread y te hasta un bon BBQ pa asina tur hende pasa un diadomingo dushi den compania di famia of amigo. Sin duda ambiente lo ta formal cu diferente presentacion y musica.
Adicional na e Fiesta Rotaria, tambe e club social ta bendiendo rifa for di den luna di januari caminda e prome premio ta un auto nobo; un Chevrolet Groove 2023. Cada ticket ta costa solamente 25 florin y ademas di e auto, bo tin chens pa gana diestres otro premio atractivo. E sorteo di e rifa lo tuma luga diadomingo atardi na e Fiesta Rotaria y den presencia di notario.
Rotary Club of Aruba ta gradici tur nan miembro hunto cu nan famia y amigo, e grupo grandi di boluntario cu ta yudando, comunidad di Aruba cu semper ta duna nan sosten, tur patrocinado cu ta aporta cu producto y servicio, Fundacion Facilidadnan Deportivo y Aruba Voetbal Bond pa nan cooperacion, media local, Gobierno di Aruba y Ministerio di Infrastructura. Nos ta topa na Fiesta Rotaria 2023 diadomingo awo 2 di april na Stadion Guillermo Prospero Trinidad.
Representantenan di Rotary Club of Aruba presente na e conferencia: Shelby Maduro (President), Luis Oduber (Incoming President y Fiesta Rotaria Chair), Kapil Sawilani (Fiesta Rotaria Co-chair) y Ryon Dijkhoff (Director of PR).
