E curso Finansa Den Mi Hogar a continua na Madiki Kavel despues di a start den Village na San Nicolas. “Meta di e curso Finansa Den Mi Hogar ta pa nos hendenan ricibi guia y conocemento cu por yuda nan tuma decisionnan financiero cu ta beneficia su propio desaroyo personal y familiar”, segun minister Geoffrey Wever.
Finansa Den Mi Hogar ta un programa di educacion financiero desaroya pa Fundacion Plan di Bida. Fundacion Plan di Bida cu su presidente sra. Paloma Osorio- Tromp tin como mision trece conscientisacion financiero den nos comunidad, ofreciendo guia con pa maneha nos finansa mas efectivo.
Despues di e prome edicion exitoso, a dicidi cu lo duna e di dos edicion di e curso Finansa Den Mi Hogar dentro di e districtonan mes e biaha aki – mas cerca y accesibel pa e ciudadonan – y un bes mas, cu participacion completamente gratis.
Ta ofrece of duna e curso di Finansa Den Mi Hogar den diferente bario dentro tur e districtonan di Paradera, Oranjestad, San Nicolas, Savaneta, Noord y Santa Cruz. Despues di a inicia den Village, e bario di Madiki tabata e siguiente bario pa ricibi e curso.
Na Aruba 3 di 10 hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera entre gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar.
Durante e curso di dos dia, cada participantea ricibi informacion riba siguiente topiconan:
Dia 1: Mi ta efectivo den mi cas – Con mi por spaar y con pa cumpra sin emocion. Mi ta paga mi debe – Kico lo pasa ora mi no por paga mi debe mas?
Dia 2: Mi ta inverti den mi futuro. Futuro di nos y nos yiunan ta importante y con nos por logra nos metanan. Mi presupuesto – Kico ta luho y prioridad y con segun bo entrada bo por presupuesta y asina logra nos metanan?
“Ta nos compromiso pa sigui ofrece e curso gratis y haci posibel cu tur ciudadano por yega facilmente y participa activamente na curso Finansa Den Mi Hogar”, segun e mandatario. “P’esey ta ofrece e segundo edicion di Finansa den Mi Hogar en bario, mas cerca di cas unda hunto cu bisiñanan e personanan por participa”,segun minister Geoffrey Wever.
Pa mas informacion y registracion pa e segundo edicion di Finansa den Mi Hogar por tuma contacto cu Fundacion Plan di Bida via telefon 5688848 of email [email protected]
