Diamars anochi na World Trade Center Curaçao a tuma luga e première di Musical Tula E Heroe y nos tabata ta presente pa cubri e tremendo obra aki cu a consisti di un elenco grandi. Libertad, fraternidad y igualdad a resona den e musical aki cu a ricibi un bon acogida di publico presente.
Sithree Adalbert ‘Cey’ van Heydoorn, minister di Enseñansa, Ciencia, Cultura y Deporte na Corsou ta bisa cu e musical aki ta algo cu na Corsou tin hopi aña sin mira. “Caminda bosonan a sa di combina asina tanto componente, ingrediente, pa dun’e un toke diferente”, segun e mandatario a expresa despues di e obra. Musical Tula a conta cu varios diferente talentonan di Corsou como tambe di Aruba cu Rocco Franken kende a actua tambe y canta den e obra aki.
E musical a consisti di actuacion, musica y tremendo talento unda cu mas importante segun minister van Heydoorn e obra aki a brinda un tremendo les di bida. “Cu nos por biba tambe como islanan hunto bek y comparti cu otro manera e rumannan cu nos a lanta.”
