No ta un misterio cu dia 7 di september proximo, Minister di Husticia Rocco Tjon tin cu aparece dilanti mesa berde den un caso di difamacion contra Patrick Paskel y Nelson ‘Speed’ Andrade, e presentadonan di e programa ‘Enfoke’.
E mandatario ta exigi rectificacion for di e presentadonan riba e acusacion cu e minister e tempo ey lo tabata sospechoso di husticia – algo cu Tjon ta nenga rotundamente. Segun Paskel y Andrade, e dignitario lo tabata parti di investigacion interno, unda e recherchenan lo a cambia proces-verbaal of lo a saca informacion confidencial pa duna colega polis a cambio di placa.
Tjon no solamente ta nenga e acusacion aki, pero el a dicidi di entama un caso contra e dos presentadonan pa aclarea e situacion aki. Paskel y Andrade, na nan turno, a cuestion’e publicamente cu si ta asina dicon su mesun casa, Vanessa Kock, ex-altocomisario di polis, a menciona den un entrevista na 2015 cu tabata tin tres polis bao di investigacion.
Despues di a anuncia cu tin un investigacion interno e tempo ey contra tres polis, a sali afor cu no lo sigui cu e investigacion. Esaki sigur ta mustra misterioso mirando cu na un forma silencioso a bari e investigacion for di mesa sin mas despues cu a anuncia esaki cu bastante fanfaria.
Den entrevista cu Minister di Integridad Ursell Arends, e ta duna di conoce cu e no ta na altura di e situacion aki. Integridad, e mandatario a duna di conoce, “kiermen haci lo corecto hasta ora ningun hende ta wak.” Tambe el a recorda cu tur minister ta pasa den un “screening rigoroso” prome cu nan yega pa eherce nan funcion.
Riba e pregunta si e ta di sigur cu tur su colega minister di Gabinete Wever-Croes ta integro, el a finalisa: “Mi no tin ningun motibo pa pensa diferente. Pero si algo bin dilanti, e ora ey lo mi evalu’e. Pero awor aki, mi no tin ningun motibo pa duda den e integridad di mi coleganan y esey mi ta keda para riba. Ami ta atende cu mi mesun integridad como persona y mi ta spera cu mi ta ‘leading by example’ como minister di Integridad. Esey ta mi meta tambe.”
