Minister di enseñansa dr. Rudy Lampe e siman aki a splica cu e siman aki ta lansa e programa informativo PEN 2030 (Plan Educacion Nacional). Un programa unda expertonan local riba e tema aki lo conscientisa pueblo cu innovacion ta indispensabel. Un di e proyectonan cu ta pendiente pa e siguiente gobierno ta independisacion di scolnan publico.
Minister Lampe a recorda loke cu a pasa den Parlamento na april 2018 y cual e ta cataloga como un blunder di e organo aki. Den un sesion 20 parlamentario a vota contra independisacion di scolnan publico y solamente Ricardo Croes a vota na fabor di e conseho aki.
“Awo a haya rapport di Departamento di Recurso Humano cu ta mustra cu e departamento di Scolnan Publico ta un caos. Si Parlamento tres aña pasa a tuma e decision corecto, e interes di e maestronan lo tabata miho sirbi. Centenares di dossier di personal di scolnan publico (docentenan) no ta actualisa. Pa motibonan politico Parlamento a bay contra, sin preocupa cu interes di e maestronan. Un docente (maestro) satisfecho, ta sirbi nos muchanan di un miho forma,” e mandatario a bisa.
Esaki ta hustamente loke el a propone na 2018, segun e mandatario. E sistema cu el a propone ta igual na tur parti di Reino Hulandes y cual pa motibonan politico a bay contra e proposicion aki. E ta lamenta cu hustamente docente y maestronan den Parlamento manera Jennifer Reyes, Marlon Sneek, Edgard Vrolijk y Sue-Ann Ras a bay contra su proposicion. Esaki mientras cu nan tur ta traha pa un stichting y no den un scol publico.
