Den preparacion pa eleccion na juni venidero, organisacion Women empOwering Women a organisa un debate cu e politiconan femenino pa nan miembronan. E enfoke di e debate aki tabata pa duna realce na informacion cu lo yuda e miembronan vota consciente durante eleccion na juni venidero. Debi na limitacion di tempo pa cu e debate por a scoge 6 politico femenino y 6 topico di interes. Pa scoge e topiconan di interes y ken lo forma parti di e debate, e miembronan di WOW a completa un encuesta anonimo.
A base di e encuesta aki a scoge e top 6 politiconan femenino:
● Lisette Malmberg / PPA
● Evelyn Wever-Croes / MEP
● Daphne Lejuez / Accion21
● Gerlien Croes / AVP
● Misha Raymond / RAIZ
● Marisol Lopez-Tromp / MAS
Y e top 6 ‘topiconan di interes’:
● Educacion
● Medio Ambiente
● Financia Publico
● Economia
● Igualdad di Genero
● Belasting
E debate a tuma luga den un sala di The Cinemas di Renaissance Marketplace, unda cu e miembronan di WOW mes a coordina y modera e evento. Debi na limitacion pa cu internet/wifi den e sala, WOW a opta pa graba e debate pa asina publica esaki riba plataforma di Facebook di WOW Aruba y haci e informacion aki disponibel pa publico.
E idea ta pa e contenido yega na mas hende muhe y asina curasha pa sa mas di e vision di cada politico femenino. Pa eleccion 2021 tin un total di 58 hende muhe participante y e ta keda na nos pa sostene nan, asina so nos lo por yega na igualdad.
Por ultimo, organisacion Women empOwering Women kier extende palabra di elogio na e 58 representantenan femenino den politica na Aruba pa haci uzo di e oportunidad pa promove y stimula mas participacion di hende muhe den politica, pa asina nos yega mas cerca di un representacion igual na Aruba.