Dialuna ultimo a tuma luga un conferencia di prensa di gobierno, caminda cu Prome Minister, mr. Evelyn Wever-Croes a confirma cu e nombramento di Zulema Dabian-Erasmus a keda cla.
E proceso di screening a sali positivo y tur cos ta cla pa Zulema subi avion direccion Washington, DC. Locual ta keda pendiente ta pa Zulema ricibi su paspoort diplomatico y pa e haya su VISA di Merca. Mientrastanto ta preparando un biahe di trabou durante e proximo dianan nos dilanti caminda Zulema lo tuma e trabounan over for di actual Minister Plenipotenciario, Joslin Croes. E ultimo aki tambe ta cla pa pasa tur locual ta pendiente y sali for di Washington rumbo pa Den Haag, Hulanda, caminda e lo ocupa e funcion di director di Aruba Huis.
Durante e conferencia di prensa, a remarca na Prome Minister, cu algun Minister Plenipotenciario den pasado a vocifera cu e funcionamento di e GevMin na Hulanda tin menos beneficio cu esun di Merca. Entre otro esun di Merca ta conta cu boshi beneficio pa famia, yiu, cas, biahe, auto y mas mientras esun di Hulanda no por conta cu e mesun beneficio cu esun di Merca.
Prome Minister a reacciona bisando cu e ta na altura cu esun di Merca tin mas beneficio cu esun di Hulanda, pero e no por cambia nada, aunke cu ta pais Aruba ta paga ambos. Segun Wever-Croes, e funcionamento ta diferente tambe. Esun di Hulanda, su funcion ta ancra den ley. Esun di Hulanda ta conta cu henter un departamento (Aruba Huis) cu ta yud’e den su funcionamento mientras cu esun di Merca ta apenas un personal e tin pa yud’e den su funcionamento.
Aunke cu Minister Plenipotenciario na Merca tin acceso na henter e embahada di Hulanda. Esun di Merca lo traha den e Embahada di Hulanda na Merca. E mandatario a splica cu Embahada di Hulanda ta pone kico ta beneficionan pa un persona cu traha den nan embahada ta conta cu ne. Pues, Aruba tin cu djis paga e salario mientras no tin nada di bisa den e beneficio cu su representante ta conta cu ne, trahando den e Embahada di Hulanda na Washington.
