Durante un bishita di trabou di minister di Desaroyo Sosial i Labor di St. Maarten Emil Lee serka minister Hensley Koeiman di SOAW djaweps 21 di yüni 2018 e ministernan a papia tokante nan desafionan komun. E ministernan a realisá ku nan por nifiká hopi pa otro i a yega na un akuerdo ku e islanan lo traha na un interkambio aktivo di hende ku ta buska trabou den sektornan di konstrukshon i horeka pa rekonstrukshon di St. Maarten.
Minister Hensley Koeiman a duna di konosé durante e bishita ku e lo hasi su máksimo esfuerso pa bin ku solushonnan konkreto pa yuda e kantidat grandi di hende lokal ku nashonalidat Hulandes ku ta buska trabou yega na trabou desente. Spesialmente sektor di konstrukshon ta keha ku proyektonan ta tarda pa kuminsá i ku un kantidat grandi di trahadonan ku fishi kualifiká den konstrukshon ta na kas. Fasilidatnan lokal di horeka tambe ta buska trahadonan kualifiká dirigí riba brinda servisio na kliente.
Minister Emil Lee a duna di konosé durante e bishita ku despues di orkan Irma mester rekonstruí St. Maarten. Tin proyektonan di konstrukshon grandi i St. Maarten tin un nesesidat grandi pa atraé trahadonan di konstrukshon ku nashonalidat Hulandes pa maksimalmente tres aña ku eksperensia den konstrukshon ku ke traha na St. Maarten, pero ku despues di e periodo di konstrukshon lo regresá Kòrsou.
Tambe minister Lee a duna di konosé ku St. Maarten djis despues di orkan Irma a haña un kantidat grandi di trahadonan di horeka ku no por traha komo no ta tur e hotelnan ta operashonal ainda. Un solushon pa esei por ta ku den high season hotelnan na Kòrsou ku tin falta di trahadonan den horeka, en bes di buska trahadó for di eksterior, permití trahadonan di horeka ku nashonalidat Hulandes for di St. Maarten pa traha temporalmente na Kòrsou.
Minister Hensley Koeiman a duna di konosé ku e lo duna su koperashon basta trahadonan di konstrukshon lokal por hasi un yamada riba vivienda adekuá, un renumerashon digno konforme merkado i posibilidatnan pa durante vakashon di konstrukshon bai kas pagá.
Lo bini un yamada pa un seshon di informashon pa tur trahado den konstrukshon ku nashonalidat Hulandes ku ke traha temporalmente na St. Maarten te un máksimo di tres aña.
