Awe mi a tuma tempo pa admira e obra di arte cu ta basa riba e dama Lolita di San Nicolas traha door di e artista Gilbert Senchi. Caminda ta duna reconocemiento na mamanan humilde Caribense cu a traha duro tur dia pa hiba nan famianan dilanti.
A base di un articulo den corant mi por a saca afo kico e storia ta tras di e monumento aki. Sinembargo mi ta haya falta di demas informacion ora mi ta para banda di e escultura aki.
Si mi ta compara e resultado final cu locual a wordo presenta inicialmente, mi ta contento cu nan a kita e logo di Minister Otmar Oduber for di e obra di arte, cual tawata un berguensa. Ningun otro escultura na Aruba tin e logo di Aruba riba dje y den e tempo cu Lolita ta representa e logo aki no tawata existi.
Ademas, mi ta haya cu e obra a keda mas atractivo awor cu el a haya colornan bunita, compara cu e version cu a wordo desvulga durante a Gobierno di AVP. Mi ta spera cu Gabinete Wever-Croes lo pone mas informacion aserca pa e storia tras di e obra aki lo por wordo comparti cu tur turista y personanan local cu ta pasa bishita ‘Lolita’ na San Nicolas. E storia di Lolita ta e storia di casi tur imigrante cu a yega Aruba ora Lago a habri. Cual a resulta cu mi welonan a bin di Boneiru y di St.Maarten pa traha akinan. Mi welanan mescos cu Lolita a traha trabounan humilde pa yuda crea miho oportunidadnan pa nan yiunan. E efectonan di nan trabou ya caba a dura pa 3 generacionnan largo: “Educacion ta yuda mas cu un generacion.”
Mi kier yama danki na Meneer Joseph Dumfries y Meneer Patricio John cu mi a topa eynan y cu a duna mi un tiki mas informacion, nan bista y pensamiento riba e obra aki. Mi ta contento cu e prome paso aki pa reconose esnan cu a yuda lanta nos comunidad y ta spera cu mas personanan cu a yuda hiba Aruba padilanti lo wordo reconosi. Mi ta ripiti cu e obra aki no ta cla sin pone informacion acerca cu ta splica ken Lolita tawata ta y kico e escultura aki ta representa pa cu e comunidad di San Nicolas y pa pueblo di Aruba. #MSJ
