Lotto keto bay ta den gara di e mafiosonan, segun minister di turismo, salubridad publico y deporte Dangui Oduber. “Un grupo di bandido cu tin lotto secuestra pa mas cu dos aña caba. Por core rond y mira e facilidadnan, por ehempel Stadion Guillermo Prospero Trinidad, Parke na Jaburibari, etc. Ta tristo pa bista cu no por organisa weganan di fogeo internacional. A purba den tur sentido di palabra pa get rid di e grupo aki, e cartel cu a secuestra deporte, cu no tin deporte na pecho, cu no a yuda deporte,” esaki ta wordo bisa door di Minister Dangui Oduber.
Nan a hasta kita Distefano Wernet. Nan a hasta acus’e, sabiendo cu nan tur hunto tabata un club. Ora tur cos a sali na cla, e mal maneho cu ta wordo hiba, no ta entrega cuentanan anual, tur facilidad ta cayendo den otro, ora cu comunidad a haya tur e informacion aki, nan a busca manera pa culpa e director, Distefano Wernet, kit’e for di trabao y haci como si fuera cu nan no a participa y no ta culpabel di tur loke ta pasando.
Wernet a gana nan den corte y por mira cu keto bay no tin cambio den e maneho. Nan kier bisa cu nan kier traha cu gobierno, y kier sinta na mesa cu gobierno. Pero ora manda nan carta, na no ta contesta. Ora pidi cooperacion, nan no ta duna cooperacion.
E minister a comenta cu e no sa unda tur placa ta bay. Di un investigacion haci pa Banco Central riba e percepcion di comunidad riba corupcion, Fundacion Lotto pa Deporte a bin na di dos luga como e fundacion mas corupto na Aruba. Na momento cu investigacion asina tuma luga, segun e mandatario, ta mas cu na su luga, si bo ta forma parti di un fundacion asina, bo mester ta e “voorbeeld functie” pa nos deportistanan, y abo ta wordo haya como e fundacion mas corupto na Aruba, boluntariamente mester entrega bo retiro y duna espacio na otro miembronan cu si kier contribui na deporte, y kier drecha facilidad.
E contribucion cu nan tin pa deporte aworaki ta 0,0. Di loke e mandatario a constata ta cu e directiva no tin notulen, no tin jaarrekening, no tin structura, no tin maneho. Nan ta djis eyden pa e beneficionan di cobra fin di luna, haya celular por nada, biaha, cumpra camara di siguridad, come, bebe.
E minister no ta kere cu esey ta beneficiando deporte. A cuminsa e proceso pa e Lotto nobo, cu lo bay competi cu Fundacion Lotto pa Deporte. A entrega e ley como uno di iniciativa. El a cuminsa cana su caminda y ta na Raad van Advies. Ta spera dentro di poco Raad van Advies tin su conseho riba e ley aki p’asina e ley aki keda presenta y pa presidente di Parlamento pa yama un reunion publico p’asina cuminsa cu e Lotto nobo aki. E ora pueblo tin e escogencia di cumpra bo lotto cerca e Lotto nobo cu ta bay wak cu 100% di e placa ta bay pa deporte, of ta cumpra e lotto na Fundacion Lotto pa Deporte cu 70 pa 80% ta bay pa e grupo Canades, esta Canadian Bank Note y e garnachinan ta keda pa nos, y cu cual mester cremencha pa yuda deporte na Aruba.
E minister a bisa di no ta di acuerdo cu e reparticion ey y a bisa e hunta di supervision. A yega di reuni cu nan. E minister a menciona cu si nan kier traha cu gobierno, nan tin cu renegocia e contrato ey. Bay renegocia e contracto cu no ta na beneficio di deporte y no ta na beneficio di comunidad. Si ta bende 15 miyon, Gobierno kier 11 miyon y nan mag di keda cu 4 miyon. Awo ta net contrario. Canada awo ta keda cu 11 miyon y como pais, ta keda cu 4 miyon. Kico por haci cu 4 miyon di deporte di un benta di Lotto cu ta genera mas di 50 pa 60 miyon anualmente.
Te ainda nan no a mustra e boluntad di kier renegocia e contracto aki cu Canada cu no ta na beneficio di nos na Aruba.
Lotto nobo
E minister ta spera cu ainda e ley pa e Lotto nobo yega parlamento. Ohala esey ta e caso y si esey ta e caso pa 2020, e lotto nobo aki lo ta un realidad.
Facilidadnan Deportivo
Awor aki Fundacion Facilidadnan Deportivo, ta encarga cu e maneho di e facilidadnan. Mester sinta na mes cu nan pa wak si nan kier yega na un acuerdo.
Aworaki ta bay bira competidor, pero e Lotto nobo lo bay tin un otro meta compara cu Fundacion Lotto pa Deporte. Fundacion Lotto pa Deporte mester genera fondo pa reparti placa entre tur e federacionnan deportivo. Meta pa e Lotto nobo aki ta pa genera fondo, pa mantencion den infrastructura di tur e facilidadnan cu ta decai na e momentonan aki.
Den esey mester yega na un bon palabracion cu FFD, si nan ta dispuesto pa asina por inverti den e facilidadnan.
Kier pone iluminacion, kier pone yerba den tur e facilidadnan, kier drecha e facilidadnan aki. Parti di e maneho tambe cu lo cumpli cun’e, caminda cu tin fondonan disponibel pa pone yerba artificial na e veld di Bubali, cual dentro di poco lo anuncia esaki oficialmente, y tambe na veld di Kudawecha, cual ta dos proyecto deportivo cu lo haya yerba artificial. Ta p’esey kier genera fondo pa asina stimula e participacion activo di nos muchanan na deporte.
Contract di Lotto entre CBN
Segun e minister, nan tin exclusividad. Ta p’esey kier mira cua hues cu ta riba e pais aki lo bay dicta contra un fundacion nobo cu ta stimula Free Enterprise, cu ta stimula competencia. “Nos ta biba den un pais liber, kier stimula mercado liber y competencia. Kier stimula Free Enterprise. P’esey e minister kier mira cua hues lo bay dicta contra e lotto nobo, mantene e cartel y e exclusividad aki, cu na final di dia ta desbentahoso na pais Aruba y gran parti di nos entrada ta bay Canada.”
E minister ta dispuesto pa drenta den bataya y lague den man di hues, pa mira kico e lo dicta na e momento ey.
