Bringado di MMA Charles Oliveira a comparti su historia y su manera di mira bida den un entrevista exclusivo cu 24ora.com, durante un bishita na Almere, Hulanda. Oliveira tabata un invitado special di Joyagear, unda el a duna un tayer. Hopi bringado di MMA tabata presente, grandi y chikito, pa haya mas indicacion con pa mehora den e deporte. E tabata un momento agradabel pa tur cu tabata presente.
Durante e combersacion cu reportero Eduardo Goeloe, Oliveira a papia tocante su tatuahe cu e frase Never Give Up, su pasion pa leon y su colaboracion cu Joyagear.
Goeloe a cuminsa e entrevista puntrando Oliveira con e tabata sinti su mes y con el a haya e ricibimento di e hendenan presente.
“Mi ta hopi contento di ta aki y ta pasa un bon momento cu tur hende. E ricibimento tabata increibel, cu tur e hendenan cu a bin. Ta hopi dushi”, Oliveira a bisa.
Un di e topiconan cu nan a trata tabata e tatuahe Never Give Up, cu Oliveira tin na e parti patras di su nek. Goeloe a puntr’e kico a motiv’e pa scoge e frase aki.
Oliveira a splica cu e frase tin un significado special p’e. E palabranan ey ta un recordatorio, a pesar di e dificultadnan cu por surgi den bida, hende mester sigui lucha pa logra nan meta.
“Nos sa cu den bida nos no por rendi di nada. Den bida bo tin momentonan dificil, bo tin victoria y bo tin derota. Pero bo mester concentra riba loke bo kier logra y nunca rendi. P’esey mi a haci e tatuahe aki na mi nek, pa e keda un recordatorio cu nos nunca por rendi”, el a declara.
Durante e entrevista, Goeloe tambe a conta cu e ta gusta leon y cu e tin un tatuahe di e animal riba su brasa. Oliveira a revela cu e tambe tin varios tatuahe di leon: un riba su lomba, un riba su brasa y un riba su pia.
Pa finalisa, nan a papia tocante e colaboracion entre Oliveira y Joyagear. E bringado a expresa su gradicimento pa e colaboracion y pa e manera cu e team ta trata dje.
“Mi ta sinti mi mes hopi gradici. Nan ta haci mi sinti na cas. E colaboracion aki tin hopi balor pa mi”, Oliveira a bisa.
