Diahuebs anochi Sportvereniging Bubali a celebra e bautismo di su uniformenan nobo pa e temporada di futbol 2026-2027, cu participacion di e diferente categorianan di e club. Segun presidente Ryan Figaroa, Bubali tin aproximadamente 250 mucha den su formacion, desde U-5 te cu Division di Honor, banda di ekipo di damas y veteranonan.
Durante e actividad, cu a tuma luga diahuebs anochi, e futbolista- y mayornan a reuni pa e momento special prome cu inicio di e campeonato. Figaroa a splica cu e club ta prepara pa un temporada cu lo inclui weganan durante henter e siman, dependiendo di e categoria.
E campeonato ta cuminsa diabierna, 23 di october, y lo sigui te na mita di aña venidero. Segun Figaroa, e calendario ta inclui weganan diasabra mainta y atardi, diadomingo mainta y tambe durante dia di siman.
E presidente a señala cu e club tin actividad den diferente categoria, incluyendo e equipo di Hoofdklasse, mientras cu Division di Honor ta cuminsa su participacion diasabra.
Invitacion pa e fanaticada
Figaroa a haci un yamada na e fanaticada di Bubali pa bin apoya e club durante e temporada nobo. E invitacion no ta limita na e weganan di Division Honor, sino ta inclui tur e categorianan, desde e futbolistanan mas hoben te na e ekiponan di mas edad.
E presidente a destaca cu e apoyo di mayornan y fanaticada ta importante pa e muchanan cu ta representa e club. Tambe, e a indica cu ainda tin algun luga disponibel pa mucha cu kier bira parti di Bubali.
Cu e lema di e club y e orgullo di Noord na dilanti, Figaroa ta spera pa mira e comunidad presente den masa pa anima e futbolistanan durante e campeonato.
“Bubali la Fama”, e presidente a expresa, mientras cu e ta invita e hendenan pa sostene e club den tur su categorianan durante e temporada 2026-2027.
