Tin un dicho na Spaño cu ta bisa “si la montaña no viene a Mahoma, Mahoma va a la montaña” y esaki ta loke e trahadonan di Stichting voor Gehandicapten Aruba (SVGA) a dicidi. Nan a acudi masalmente na sede di Gobierno pa busca un reunion cu Minister di Asuntonan Social Glenbert Croes.
E grupo tabata compaña pa representantenan di nan sindicato, entre otro Rudy Geerman. Minister Croes a ricibi nan y despues di casi un ora a sali bek. E mandatario a bisa di tin tur comprension pa e trahadonan y e manifestacion. “Como Minister di Labor mi tin cu bisa cu ta nan derecho di manifesta riba nan inkietud y preocupacionnan cu pa algun aña ta colgando den aire, sin cu nan a wordo atendi.”
E mandatario despues a bisa cu e ta asumi su responsabilidad pa busca e solucion pa e trahadonan di SVGA. “Mi no ta bay laga nan keda colga. Pero mi tin cu bisa cu e eror di mas grandi cu a pasa na e pais aki ta dia cu a bin cu e areglo nobo di subsidio door di e Gobierno anterior. Nan tabata pretende cu tur e derechonan di prome cu 1 di januari, 2017, no ta existi mas. Dia cu a acepta output subsidie, tur derecho pendiente di trahadonan, segun e kier, mester a wordo elimina. Pues nan no ta conta mas. Dia cu a bin cu output subsidia cu a manca tur fundacion, tur hende nan promocion di 2017 en adelante no por wordo paga.”
Trahadonan di SVGA cu protesta dilanti Bestuurkantoor
Posted by 24ora on Tuesday, July 9, 2019
Loke e mandatario a haci, ta lanta un comision cu ta re-evaluando e situacion y pa yega na un sistema di subsidio nobo pa honra e derechonan adkiri di tur e trahadonan, cu a keda colga. “En realidad mi mester para hunto cu e trahadonan, pasobra loke cu a haci cu nan, no tabata cos di haci.” Awo pa honra e derechonan di e trahadonan, cu den futuro nan no tin problema mas cu e asunto di promocion, mester bin cu un areglo di subsidio nobo. E Output Subsidie cu Gabinete Mike Eman a introduci, cu a afecta tur e fundacionnan, mester yega un fin.”
Tin un bulamento di pipa formal, segun Minister Croes, den e departamentonan di cual ta bay atende cu e promocionnan atrasa. “Mi ta bayendo cu un proposicion Ministerraad awe riba esaki. E ta regarda tur e bevorderingnan pendiente di prome cu 1 di januari, 2017. Punto di salida ta cu derechonan adkiri di trahadonan mester wordo honra y respeta. Niun fundacion, debi na e output subsidie, ta den e posicion pa paga nan trahadonan. Mi compromiso cu nan ta cu output subsidie ta bay yega su final.”
Pa tuma e crisis social na serio, e ta haya cu mester tuma e problema di esnan traha den mundo social na serio. “Mi lo cumpli cu nan, pero e fondonan di e crisisplan social ta bay pa e urgencianan identifica di problema social. E tema di e trahadonan ta Gobierno mester yega na un solucion. Esey no ta bay for di e crisisplan social.”
