Na aña 2017 a bini cu un sistema di subsidio nobo pa e Stichting voor Verstandelijk Gehandicapten Aruba (SVGA), pero no a logra debidamente kico ta bay pasa cu derechonan di e trahadonan. Riba esaki a haci palabracion, pero no ta cumpliendo cu nan. Esaki tabata opinion di ex Presidente di FTA Rudy Geerman, kende tabata hopi envolvi den e negociacionnan.
Trahadonan a dicidi di protesta, pasobra e problema di nan derechonan ta algo cu ta data for di 2016 y cuatro biaha caba a sinta na mesa: cu e Minister anterior y esun actual. Hasta Geerman a bisa cu a papia cu 4 Minister riba e tema aki. “Lamentablemente niun biaha nos ta haya atencion. Cu e Minister actual nos a papia tres biaha.” Aworaki a logra haya un reunion cu Minister Croes atrobe y a haci cierto palabracion. Awo FTA ta bay pone tur loke cu a palabra riba papel, pa evita mal interpretacion despues.
Na 2017 a drenta e sistema nobo di areglo di subsidio, cu tabatin bon intencion pero no a ehecut’e di e bon forma. Ta parce awo cu desde 2017 no kier papia mas di derechonan di e trahadonan. Nada di eaki no a wordo regla prome cu e areglo nobo a drenta na vigor. “Esaki sigur no tabata e intencion. A introduci algo nobo, pero e derechonan di e trahadonan mester keda respeta.”
FTA a reuni cu Minister Glenbert Croes riba problemanan di SVGA
FTA a reuni cu Minister Glenbert Croes riba problemanan di SVGA
Posted by 24ora on Tuesday, July 9, 2019
Den e reunion e sindicato a pone un fecha, cu ta fin di october, pa regla tur loke cu ta pendiente di e trahadonan, manera promocion, keda paga. Tin dos situacion cu tin nan preocupa. Uno ta cu tin un grupo di trahadonan cu a sigui cierto estudio cu nan a finalisa. “E estudio aki tin cierto balor y mester hinca nan den un otro schaal.
Pero esey no a sosode pasobra e stichting a bisa cu e no tin placa. Semper ta bisa cu ta stichting mester percura pa paga e trahadonan. E cos aki mester wordo regla no mas laat cu october di e aña’ki.”
E otro problema ta cu esnan cu a drenta cu e diploma ey caba, no ta poni den e schaal debido. Gerencia ta bisa cu no por paga nan manera debe ser, mientras cu esnan prome cu nan no a haya pago mes ainda. Awo tin un palabracion cu pa october e cos aki mester ta tras di lomba. E obligagacion pa cu e trahadonan di e stichting ta costa 500 mil florin cu forsa retroactivo. Ta papia di un grupo di un poco mas cu 30 persona.
El a recorda cu e Ministernan a wordo scogi pa maneha y mester busca e solucion. Maneha ora cos ta bon tur hende por haci esey, pero den e caso aki tin un obligacion pa cu e trahadonan. “Si tin un situacion financiero cu no ta asina bon mes, pero e salario ta wordo paga tur luna. Nos no ta pidi nada extra, solamente loke cu e trahadonan tin derecho riba dje. Apesar cu e situacion ta malo, tur luna e trahadonan tin cu cobra pasobra nan a traha. Mas nan tarda, mas e ta costa. No por keda warda mas.”
Geerman a splica tambe cu e intencion no ta pa saca e placa aki for di Fondo Crisisplan Social, pero e mester wordo saca di e post general di gastonan di personal. E sindicalista no kier papia ainda di con nan lo por ricibi e pago.
