A invita Minister Chris Romero pa un Townhall meeting a wordo organisa pa San Nicolas Business Association, como minister di transporte y esun encarga cu e proyecto di Fast Ferry, pa asina duna un update con nos ta awor aki den dje, pero tambe kico ta e siguiente pasonan.
Por a wak cu e publico tabata basta grandi y atento y tabata tin basta pregunta riba e Fast Ferry.
Den ki fase
A trece for di Hulanda un persona, sr. Toon Jansen, kende ta experto den e area aki y cu tin mas di 10 aña coriendo tras di e proyecto aki, pa asina, hunto cu sr. Rafael Estrada, cual tin un consultancy hunto y asina ey, percura pa trece e persona aki Aruba. Ta den e fase cu a reuni caba cu Imigracion, tambe cu Douane y lo sigui cu e otro stakeholdernan. ATIA tambe lo bin na beurt, AHATA, etc. E idea ta pa pone tur stakeholder concerni, tur e departamentonan publico cu bo mester haci e proyecto aki un realidad. Pone tur nanishi den e mesun direccion.
Cu otro palabra, como gobierno tin cu bisa cu esaki ta loke ta bin cun’e y pesey ta bin cu e persona aki pa contesta tur pregunta cu tin. Nan preguntanan cu tin tras di dje, dudanan y asina aclareanan. E minister a menciona cu a haci esaki y ta kere cu e siguiente paso ta awor aki, cu Minister Romero, hunto cu minister Bikker, tuma contacto cu Corsou, pone e pasonan necesario pa yega na un acuerdo di cooperacion.
Kico e ta
Esaki ta cu pa aki seis luna cu kier yega asina leu, pa firma un contract entre Corsou, Aruba y e posibel operator. Esey ta den e fase cu ta awor aki.
