Un tema cu ta destaca t’e debate riba e incentivonan fiscal destina na impulsa e crecemento economico den e areanan clave di Aruba, manera San Nicolas y e arterianan principal comercial di e isla manera Caya Grandi.
Durante e discusionnan, varios comerciante a expresa e urgencia di conta cu cierto estimulonan manera tax break of tax holiday. Sinembargo, director di e Departamento di Impuesto, Luenne Gomez-Pieters, no ta mustra di ta mucho habri pa e idea p’e proposicion aki, argumentando cu segun e ley no por discrimina entre comerciante.
Gomez-Pietersz tambe a enfatisa riba e importancia di mantene un mercado husto y competitivo pa tur e participantenan, sin duna privilegio na cierto sector comercial riba otro. Sinembargo, e postura aki ta trece interogante riba e vision di e minister relaciona cu e manehonan economico, specialmente considerando e introduccion reciente di Aruba Fair Trade Authority.
Como reaccion n’e preocupacionnan aki, minister Wever a aclaria cu no ta existi un contradiccion den e posicion di e departamento di impuesto. El a splica cu si tin restriccion internacional encuanto re-fencing’, ta existi reglamento cu ta permiti cierto flexibilidad y alternativa pa cumpli cu e rekisitonan aki.
Wever tambe a anuncia cu proximamente lo presenta incentivo fiscal specifico pa diferente sector comercial, aunke el a enfatisa e importancia di cumpli cu e normanan internacional riba materia fiscal.
E debate aki ta subraya e complehidad di formula maneho economico cu ta stimula e crecemento sin compromete e igualdad y e cumplimento di e standardnan internacional. E proximo anuncionan di incentivo fiscal lo ta crucial pa determina e enfoke di Aruba riba e aspecto aki y su capacidad pa mantene na vanguardia riba e scenario economico global.
