Sindicato SEPPA y delegacion di trahadonan dialuna atardi un biaha mas tabatin un reunion cu Minister di Husticia Andin Bikker relaciona cu e funcionamento di Guarda Nos Costa y e maneho di esaki. Principalmente cu sra. Trudy Hassell ta atende cu e personal.
Loke cu a logra den e encuentro di dialuna atardi ta cu e Mandario ta bay laga Departamento di Recurso Humano (DRH) haci un quick-scan di e 30 punto di preocupacion cu e trahadonan a trece dilanti den un carta entrega na e mandatario. Tambe Minister ta bay pone un persona cu ta bay atende exclusivamente cu personal. Otro promesa cu e mandatario a haci na SEPPA y delegacion di empleadonan di GNC ta cu den un tempo hopi cortico ta bini cu un solicitud habri pa un hefe di GNC.
“Esakinan a caba di keda palabra un rato pasa na mesa,” Edmundo Marlin, Vice Presidente di SEPPA a bisa na salida di e reunion
Un biaha mas e sindicalista a enfatisa cu e trahadonan no tin problema cu disciplina pero e forma di proceder di sra. Hassell, kende ta intimida, menasa, humiya y falta respet na e trahadonan. Si tribi di tin un opinion diferente, represalia ta wordo tuma contra e trahado. Esaki, el a bisa no tin nada di haber cu disciplina. Si tin problema cu un trahado, tin un caminda pa cana, segun LMA. Y ta Gobernador ta tuma un decision ki medida ta wordo tuma.
El a bisa cu si mantene su mes na LMA, no tin problema, pero Hassell no ta sigui procedura di LMA y esey ta loke cu SEPPA tin problema cune.
Na final el a bisa, cu ta contento toch cu resultado di e reunion y e promesanan haci door di Minister Bikker.
