Tin masha hopi cas awor aki, hasta cu grabacion como prueba, ta bayendo rond. Hasta snacktrucknan ta wordo atraca awo. Segun parlamentario di AVP, Arthur Dowers, e minister Bikker di Husticia, mester tuma conseho di parlamentario Bikker. Esey ta nifica tuma su retiro.
Pakico
Esaki ta un minister cu pa ocho aña largo, cu kier a drenta partido AVP e tempo aya pa bira minister di husticia y awe, despues di ocho aña cu el a grita tur dia cu e tin un plan y e ta bay soluciona tur problema di crimen di nos pais, awo ta resulta cu e no por soluciona nada.
AVP nunca tabata tin e ilusion cu Andin Bikker pa e drenta den e partido y subi pa bira minister di husticia. Andin Bikker no tin un idea kico ta encera minister di husticia. Ningun hende, ni Dowers no ta kere esey.
Pero Andin Bikker, den un forma hopi consistente y arogante, a keda grita cu e tin e plan y e solucion.
Un aña apasa, y te dia di awe e no a presenta ningun plan. A ripara cu e no ta compronde kico ta nifica maneho di husticia. Dowers a mira tambe cu e ta gabando tur e Cuerponan cu AVP a fortifica, con bon nan ta funciona. Dowers ta contento cu alo menos e ta admiti cu e trabao cu a wordo haci bao di responsabilidad di gobierno anterior tabata un tremendo trabao. Hecho ta keda cu no mester a priminti nunca cu e lo para tur crimen. Ni tampoco tin prueba cu e tin un plan pa soluciona tur cos.
E plan ey simplemente no ta existi y ni lo existi bao di su maneho. E ta mirando cu ta implementando parti di e plannan di AVP. Dowers ta contento cu a lo menos e ta copia y ta sigui cu e cosnan pa asina ey pueblo toch no lo keda desampara. Pero di Bikker no ta spera nada.
Loke ta mas tristo cu e persona aki a haya gran cantidad di hende cu por a yuda. El a kita varios di nan, persigui varios di nan y awe ta resulta cu mester di nan mas cu nunca. E situacion di crimen cu tin na mundo, no na Aruba so, ta haci cu bo mester pone tur cabes hunto, tur hende cu por duna un contribucion, pa hacie na nan forma, pa asina garantisa pa bo tin trankilidad den bo pais.
Si e no ta inspira confiansa den pueblo, e no ta inspira tampoco cu hende por pensa cu lo yega un momento cu berdaderamente, e en todo caso lo tin control riba e situacion. Dowers tin tur confiansa cu e cuerponan cu nan a laga ta bon ekipa, ta bon experencia, cu nan lo sigui bringa e lucha cu mester wordo hiba.
Dowers a comenta cu e criminal no lo anuncia ki ora nan lo bay comete crimen. Pero tin momento cu cos ta pasa riba bo pais, bo tin cu adapta bo strategianan y actua contra di nan. No ta mira adaptacion di strategia na e momentonan aki. Si bo tene cuenta cu bao di responsabilidad di Dowers, a logra baha crimen riba mayoria parti. Tabata tin atraco, pero nan tabata abusa di dje. Tabata blow nan out. Nan tabata anuncia atraco cu no a tuma luga. Tabata tin informacion di hende yega na nan, cu tabata paga hende pa comete atraco. Asina mes bo ta mira cu e atraconan. A custuma e hendenan y awo e abuso contra pueblo lo sigui. E meneer aki ta haci un problema cu e no por cumpli ni lo bay cumpli, e mester tuma e honor na su mes e momento aki.
Dowers a traha tur e añanan aki y nunca a priminti di lo para tur crimen, pero si a priminti di lo haci e maximo esfuerso. A traha hopi duro, pa percura pa limita mas tanto posibel e daño na e pueblo. Bikker a haya impresion cu e cos aki ta algo simpel. El a hasta duna forsa na e criminalnan e tempo aya, bisando cu cada biaha cu nan comete un crimen cu ta Dowers. Awor aki, loke ta pasa ta, cu e ta pagando un prijs hopi caro pa un cos cu den cierto sentido e mes a duna forsa y yuda crea.
