‘No enfoca solamente riba bo estudio, pero tambe riba e aspecto di cultura, deporta of loke bo por haci den bo tempo liber. Esaki por yudabo na un bo formacion na e momento aki como studiante y e persona cu bo kier mira mayan.’
Esaki tabata palabranan di Minister Plenipotenciario Guillfred Besaril na e studiantenan di Aruba y di otro islanan Caribense cu a scohe pa Amsterdam como ciudad pa nan estudio. E mandatario tabata invitado special na stadhuis di Amsterdam unda diahuebs merdia 23 di augustus tabata tin un recepcion pa e studiantenan di Curaçao, Boneiro, St. Maarten y Aruba. Na stadhuis di Amsterdam burgemeester interino Simone Kukenheim a yama tur e studiantenan bon bini.
E recepcion a conta tambe cu presencia di Minister Plenipotenciario di St. Maarten Jorien Wuite, Minister Plenipotenciario interino di Curaçao Eunice Eisden, director a.i. di Arubahuis mr. Glenn Ling y mentor pa Amsterdam Lourdes Bramble-Tromp.
Den su discurso na e studiantenan sra. Kukenheim a papia di su temporada como studiante y bisa e grupo di studiante cu nan mester trata na haci Amsterdam nan segundo hogar. ‘Amsterdam ta un ciudad grandi. Boso mester mira con boso ta fit den e ciudad aki. Pero corda bo no ta bo so na Amsterdam. Busca compania cerca otro studiantenan. Pa ayudo ta bon pa acerca docentenan, bo mentornan of organisacionan di studiantenan. Esaki ta hopi importante cu por duna bo sosten durante bo estudio.’
Burgemeester interino Kukenheim a papia di Amsterdam cu ta un ciudad conoce pa su diversidad den su poblacion. ‘Amsterdam ta brinda hopi festival, pero e ciudad ta para keto tambe na conmemoracionnan grandi, manera conmemoracion nacional di e Abolicion di Esclavitud dor di Hulanda na 1863 cu ta tuma lugar riba 1 di juli den Oosterpark. Lo ta bunita si boso por ta parti di tur esaki.’ Asina Simone Kukenheim a bisa y a desea e studiantenan tur clase di exito cu nan estudio.
E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante. Na final e studiantenan a participa na un quiz pa mira con bon nan conocimento di Amsterdam ta.
Despues a sigi un introduccion di diferente instancianan cu ta di importancia pa e studiantenan.
Minister Plenipotenciario Guillfred Besaril a haci uso di e oportunidad aki pa papia cu e studiantenan y pa tende con ta bayendo cu nan prome simannan na Hulanda.
Esaki ta di nuebe aña cu Gemeente di Amsterdam ta organisa e recepcion aki pa e grupo nobo di studiantenan di e parti Caribense di Reino Hulandes.
