Mike Petronia: Ta sinti cu cacho ta mas importante cu mi yiu asesina

15 April, 2024, 9:00 pm

Mike Petronia, tata di Sayuri kende a perde su bida cu 19 aña a causa di un arma di candela, ta recorda parlamentario Marco Berlis cu e castigonan mester ta mas pisa. E tata a bin ta hiba un campaña contra uzo di arma di candela desde cu su yiu a perde su bida den un forma tragico na juni, 2021.

Den e dianan aki el a pone un post riba Facebook cu a hala atencion. E ta pidi pa hisa e castigo ora cu ta uza arma di candela pa kita bida di un persona. Un di nan cu a reacciona riba dje, tabata parlamentario Marco Berlis, kende a bisa cu di nan parti a cumpli caba pa aumenta castigo. “Cu tur respet pa meneer Berlis, mi a pone e post pasobra nan kier bin cu leynan pa cachonan, ora cu nan maltrata nan. E ta bon, pero ki hubo di e ser humano, cu tin hopi balor. Esey ta e leynan cu mester ataca prome, pa subi e castigo ora di mata hende.”

E ta kere cu no por t’asina cu ta mata hende y e castigo, pa e famianan, ta abou. Berlis ta papia cu na 2020 a aumenta e castigo di uzo di arma di candela pa kita bida di hende. A mata Sayuri dia 3 di juni, 2021. No por t’asina cu den un caso asina esun responsabel ta sali despues di algun aña caba. E ta kere mas bien mester bay cera nan pa bida largo. “Bo no ta suppose di sali mas pasobra bo a kita bida di un ser humano sin motibo. Mi no ta papia pa mi yiu so. Mi ta papia pa tur esunnan cu haya nan den un situacion asina.”

E ta admiti cu no por acerca un hues riba e tema di castigo. Pero si e ta haya cu Minister di Husticia Rocco Tjon por bay Ministerio Publico y averigua pakico e castigonan ta abou. E no ta mira cu ta haci esaki.

Un tempo Petronia a manda un carta pa Prome Minister Mark Rutte di Hulanda. Y el a haya contesta tambe. Eyden ta menciona cu ta compronde y aprecia su lucha, pero cu autoridadnan di Hulanda no tin nada di bisa riba e tema aki na Aruba. P’esey a referi Petronia na e gobierno di Aruba cu su preocupacion.

Loke cu e sa ta cu mester subi e castigonan. Si pone castigo di bida largo, esunnan cu tin pensa di comete un crimen di e indole aki, lo pensa su mes dos bes prome cu e comete e acto.