Riba e Facebook di parlamentario di MAS drs. Marisol Tromp por lesa cu finalmente el a haya e informacion cu Minister Glenbert Croes lo presenta den parlamento. Esaki ta mañan (diamars) mainta.
E parlamentario a skirbi “diamars 16 di april porfin Minister a haya un buraco den su agenda cu yen di biahe p’e bin di transito Parlamento di Aruba p’e reunion publico”.
Y a probecha pa recorda tur hende cu ya a pasa un aña y dos luna desde cu el a haci su prome peticion pa e minister en cuestion bin parlamento tocante “su maneho ineficiente, intransparente y frustrante riba Inmigracion na Aruba. Nos a pidi pa un reunion publico, for di 15 di februari 2023.”
Despues di esey, el a manda rappel mas cu un biaha unda cu ta recorda Presidente di Parlamento pa pidi e mandatario presenta den e parlamento pa por duna un splicacion, entre otro tambe riba e problema na DIMAS, cu entre otro e funcionario di mas halto eynan, Kathy Ruiz-Paskel.
Tromp a finalisa comentando cu “mientras tanto e minister aki tabata druk biahando rond mundo, cerando supuesto ‘dealnan’ cu no ta yega na nada concreto. Diamars 16 di april porfin minister a haya un buraco den su agenda cu yen di biahe, pa pasa di transito parlamento.”
