Despues di a ricibi informacion den un bijeenkomst porta cera cu Minister di Husticia Rocco Tjon, e lider di Accion21 a sali pafo no mucho convenci cu tur cos a bay bon. “Sigur cosnan hopi straño a tuma luga,” Miguel Mansur a bisa na salida di e reunion.
Diahuebs den oranan di merdia parlamento a tene e encuentro aki y na salida diferente di e parlamentarionan a duna un declaracion y a expresa nan mes.
Mansur a bisa cu el a tuma nota cu tabatin un destaho publico unda cu a descualifica e compania Sadi SAS (doño di e Helicopter). Despues a sigui e procedura por medio di un sistema yama Request for Information (RFI). A resulta cu despues a base di conseho di e abogado cu ta representa e compania, kende alabes ta consehero di e minister, a firma e contracto. “Sigur cosnan hopi hopi straño a sosode.”
A scucha e minister bisa tambe cu e famoso Carlos Eduardo Restrepo, kende ta deteni na Merca sospecha di narcotrafico, nunca tabata un accionista di e empresa. Pero diferente publicacion na Colombia, publicacionnan manera den SEMANA, si ta mustra cu e tabata accionista te cu cierto fecha.
Awo e minister no tin ningun informacion tampoco si e actual accionistanan ta famia di Carlos Restrepo. Mansur a pidi pa haya copia di e registro di accionista, desde cu a funda e compania. Pero niun di e documentonan aki ta existi. “Loke mi ta haya preocupante ta cu Gobierno ta bay tras di e informacion cu e mesun compania ta duna nan.” Pero aki na Aruba no tin copia di ningun registro entrega y gobierno a simplemente confia riba tur e informacion cu e mesun compania a suministra na nan.
E no por bisa otro cu e caso ta hopi dudoso. Den tur e informacionnan ricibi, e ta kere cu no por bay haya algo di corupcion, pasobra no tin informacion di kende a haya finders fee. Of kende a ricibi soborno. Pero mas cla e no por ta cu tin corupcion.
E Politico a mancha riba e caso a cuminsa cu e forma con a otorga e contracto, na un compania cu a descualifica. A haci poco control den un contracto miyonario cera cu Gobierno. P’esey e ta pidi pa un dossier cu Ministerio Publico por traha su caso.
E ta lamenta e posicion di coalicion, unda niun miembro a haci un pregunta. Manera custumber, a tuma un rol di defende gobierno. Ta oposicion ta pusha riba e asunto aki. “Esaki tabata un intento pa trata di tapa corupcion den Gabinete Wever Croes. Tur e documentonan cu minister a presenta den parlamento, por kita nomber y pone publicamente. Sikiera por a laga e representantenan di pueblo pa keda cu e documentonan. Te inzage, e minister ta bay bek cu tur e documentonan.
Loke a constata ta cu e minister no tabatin forma of prueba pa defende e contracto ni su ponencianan cu e persona Restrepo nunca tabata involucra den e compania.
Ta papia aki di un contracto cu tin di haber cu un Cuerpo Policial pa cual hamas por a tuma e posicion di djis acepta palabra di e abogado di e compania. Mester pidi comprobante di e informacion ricibi pa wak si e ta corecto. No tin evidencia cu a pidi pa esaki tampoco.
Pa finalisa, e parlamentario a bisa cu probablemente e posicion di prome minister den e tema aki ta uno di “ami no sa” cu ta su lema ora cu e tin algo cu e no por responsabilisa su mes p’e.
