Durante e reunion cu directiva di SPA a yama pa trata algun punto di interes importante pa miembronan di KPA, a surgi un carta cu ta un mocion di desconfiansa contra e Presidente, y su directiva. Esaki a bini di un grupo cu ta malcontento pa e hecho cu e Presidente a firma pa paga un cuenta di Abogado di un caso den cual e tabata envolvi.
E presidente Edgar “Efa” Maduro a bisa cu e suma cu e miembronan ta papia di dje, esta 30 mil florin, no ta cuadra cu realidad. Segun Maduro, den un reunion cu miembronan a keda aproba cu lo paga Abogado pa un caso di accidente den cual e tabata envolvi. Pero, el a bisa, door di negligencia di e diferente Presidentenan cu a sinta, e suma aki no a wordo paga durante 10 aña largo. E suma en cuestion mes no tabata grandi, pero door cu no a paga, e interest a sigui core. Tin tres presidente a pasa den e asunto aki y ningun a pague. “Ami no tin culpa di e problema ey. Mester cuminsa pa reclama for di e prome presidente te na di tres cu door di nan negligencia no a paga e suma.” E pago aki finalmente a wordo haci ora cu Maduro a bira Presidente, na momento cu beslag a wordo poni riba su salario. Esaki ta un di e problemanan cu e grupo malcontento tabatin.
El a bisa cu 37 di e 400 y pico miembronan tabata di acuerdo cu e mocion di desconfiansa. Loke ta e problemanan cu tin den Cuerpo parce ta bon, pasobra nan no a worry cu esey, Maduro a declara.
Maduro a admiti cu tin hopi miembro cu tabata ausente y e grupo grandi cu no a acudi ta straatdienst. Esaki ta lamentable, pasobra e puntonan cu a wordo poni riba agenda ta bay riba hermentnan cu KPA mester pa su miembronan por funcion bon.
E grupo cu tabata na fabor di e mocion, tin e pensamento cu e mocion di desconfiansa cu a wordo aproba a core cu e directiva, pero Maduro ta bisa cu esaki no ta e caso. Denter di algun siman ta bay yama un reunion unda cu lo discuti e mocion aki. Mientrastanto e directiva actual lo keda.
Si e presidente ta sinti cu KPA ta parti den dos y nan a bin ta trahando pa uni y hacie un Cuerpo Policial y un forsa. Aworaki ta sinti cu tin dos Cuerpo. Kico ta causa e division, e ta bisa, ta hopi cos cu kisas tin di haber cu politica, cu e hefe nobo cu mester drenta, etc. Ken ta bay bira e waarnemend Korpschef ta algo cu ta den man di Minister di Husticia hunto cu Prome Minister. Pero e no sa si ta esaki ta e problema. E ta lamenta cu ora di yama reunion e miembronan no ta acudi pa expresa nan pensamento.
El a enfatisa cu nan no tin problema cu e decision di e grupo di Justitiele Dienst. Si nan kier pa yama un eleccion, e directiva ta transparente y lo yama un eleccion. Si esey ta e caso, Maduro a bisa, e lo postula su mes pasobra e ta sinti cu e cambionan cu nan lucha pa logra haya ta hopi cerca. “El a priminti nos e cambio, e material, pa nos por traha. Nos ta na punto di logra esakinan. Nos por yega na un pensioen via di APFA. Esaki tambe ta den negociacion.”
