Diabierna atardi, 8 di December 2017, miembronan di FUNDECO (Fundacionnan den Cooperacion) a re-afirma nan cooperacion dor di firma un convenio di cooperacion pa dos aña mas. Di e manera aki ta extende e cooperacion entre e miembronan.
E acto di firmamento a tuma lugar na oficina di SVGA na Piedra Plat. FUNDECO ta un plataforma, representando mas cu 20 fundacion trahando riba tereno di Bienestar y Salubridad na Aruba. E plataforma di cooperacion a wordo fundi na November 2015 cu sosten di CEDE Aruba cu e meta pa mehora e colaboracion entre e diferente NGO nan. Un punto importante di salida ta pa traha y promove transparencia den trabou y traha di un manera adecuado, professional, effectivo y efficiente hunto cu otro y tambe cu e instancianan di gobierno. Tur cos na beneficio di e cliente y grupo meta di e organisacionnan. Un otro punto di salida ta pa percura pa un voz comun den combersacionan cu Gobierno encuanto asuntonan cu ta regarda tur miembro, entre otro maneho di subsidio di Gobierno. FUNDECO ta aporta den un manera critico-constructivo na e cambio di e forma di financiamento di e NGO’s. E cambionan di e sistema di subsidio a wordo introducí dor di Gobierno di Aruba desde 2016. E proceso di cambio ta andando y lo tuma su tempo. Fundacionnan lo wordo financia a base di nan
resultado y costo di nan servicio y esaki tin consequencia pa maneho di e fundacionnan.
FUNDECO ta desde 2016 den combersacion cu gobierno, entre otro pa haci e cambionan necesario den e subsidieverordening pa fortifica e fundacionan y pa nan por traha mas independiente di Gobierno. FUNDECO kier logra den dialogo cu Gobierno pa crea un modelo financiero cu ta neutral, transparante y confiabel pa tur partido. E organisacionnan cu ta forma parti di FUNDECO ta: SVGA, Wit Gele Kruis, SABA, Casa Cuna Progreso, Stichting Kinderhuis Imeldahof, FMAA, Fundacion Anti Droga Aruba, FUNARI, Ambiente Feliz, Stichting Reclassering en Kinderbescherming, Fundacion Guia Mi, Parlamento Hubenil, Fundacion
respetami, Fundacion pa nos Comunidad, Fundacion pa Hende Muhe den Dificultad, Cas Marie, Biba Bou Guia, Sonrisa, Tienda di Educacion, Fundacion pa nos Muchanan y FAVI.
Plataforma FUNDECO ta habri pa amplia su miembrecia cu NGO’s trahando den area di bienstar y salubridad na Aruba. CEDE Aruba ta conseha y facilita e trabou di plataforma di coperacion aki. Pa cualkier pregunta por tuma contact cu Drs. Ru Croes, Presidente di e stuurgroep cu ta maneha FUNDECO via: [email protected].
