Parlamentario Mervin Wyatt-Ras ta trece padilanti cu ta un lastima cu ainda e Ley di Kinderopvang of ley di Creche no ta implementa. Pa e motibo ey Wyatt-Ras recientemente a manda varios pregunta dirigi na e minister encarga cu Asuntonan Social, pa haya sa ki dia esaki lo tuma lugar.
E minister aki durante un reunion de parlamento a contesta cu e ley pronto lo por ser implementa, sinembargo tempo ta pasando y no ta tende nada. Parlamento no ta informa di kico ta pasando. Por menciona e baby cu a perde su bida no mucho tempo pasa. Esaki a crea incertidumbre. No solamente ta trata di reglamentacion, tambe di equipa e lidernan cu informacion y educacion pa por anda cu e exigencianan den educacion.
E preguntanan cu Wyatt-Ras a manda pa minister ta entre otro ki dia lo implementa e ley? Kico falta pa implement’e? Si minister por otorga parlamento e plan di implementacion. Si por manda e exigencianan di calidad pa Parlamento? Si lo tin co-financiamento pa informa parlamento di esaki. Tambe a puntra tocante e estudio cu e lidernan y directornan di creche mester tin cu sigui, pa na por cumpli cu permiso.
Durante tratamento di presupuesto di aña 2022 Wyatt-Ras hunto cu demas colega a presenta un mocion pa por regla algun rekisito pa garantisa ehecucion di e ley di cuido y guia di nos muchanan, tanto den e crechenan como den Trai Merdia. Ta un lastima cu e mocion aki no a ser aproba paso e fraccionnan cu ta sostene gobierno no a mira su importancia.
Ta na 2017 cu e ley di Kinderopvang of e ley di creche a ser trata y aproba na un forma unanime den parlamento. Aki fraccion di AVP a entrega un mocion pa bin cu co-financiamento entre otro door di sector priva. E tempo ey ya caba a fiha kwaliteitseisen. Lo a investiga co-financiamento y lo mester a haci nulmeting y hasta lo mester a institui un inspector pa garantisa calidad. Sinembargo no mucho a ser haci despues di 2017. E minister anterior hasta a kita diferente di e lidernan di Traimerdia y a pasa Kindercentra y Traimerdianan for di e ministerio di Enseñansa pa e ministerio di Asuntonan Social. Wyatt-Ras ta spera cu pronto ehecucion di Ley menciona por mira luz di dia.
