Cu un sintonia di casi 800 mirones riba Facebook y mas ainda riba nos canal di YouTube, diasabra anochi e gran mayoria di e audiencia pa e Aruba Gran Lighting Parade Oranjestad 2024 tabata claba, “manera bolo preto na bruid” riba 24ora.com. Un elenco grandi di presentadonan a sa di entreten’e y informa e siguidonan di tur locual tabata sosodiendo riba Vondellaan y sucesonan policial rond di e parada di luz.
E cobertura a start algo pasa di 8:00 pm y a termina despues di como cinco ora y mey. Mientras cu Patrick Paskel y Mark-Benson Denz tabata e presentadonan mas ariba, abou riba caya a conta cu Nelson Andrade, Edward del Orbe y Leo Geerman. Riba caya tabatey Marko Espinoza, Brian Koolman, Carlos Yedallah y Laura Morrel. Hunto a percura pa e miles di siguidonan na cas, na trabou, den hospital, den nan auto of unda cu ta rond mundo, por a sigui tur detaye di e parada.
A drenta reaccion te for di Bali y hasta Hapon, di tur cu tabata sigui e transmision di 24ora.com. Esey separa di e mayoria cu tabata reaccionnan for di Hulanda, Corsou y Boneiro, cu ta mercadonan grandi di e website mas grandi di Aruba.
Na tur, tabatin mas di 47 mil hende cu a mira parada di luz Oranjestad online via Facebook di 24ora y 4.200 cu a mir’e via YouTube. Tur esaki sin conta e videonan cortico (reel) cu a publica di tur grupo y personahenan conoci di carnaval. Riba Facebook tin riba 1.1K di “likes” demostrando cu e gran mayoria di e siguidonan a gusta e presentacion, e colornan briyante y e forma unico con e imagennan tabata conta tur detaye y sin sconde e luho, alegria y goso di cada un participante.
Diabierna merdia, pa 12:00 pm, lo tuma luga e di dos y ultimo edicion di Enfoke “carnival edition” for di Vondellaan. Na e trailer di 24ora.com lo tin e presentadonan di Enfoke, mas e coleganan di 24ora.com pa parti cup di “manera bolo preto na bruid” y un cantidad grandi di regalo, cortesia di e lista largo di patrocinadonan cu ta sostene e cobertura di carnaval di 24ora.com.
Tur esaki lo sosode entre 12:00pm pa 2:00pm, sea ta pasa den auto of ta yega cerca ey. Siman pasa caba a paralisa henter Vondellaan cu e transmision y e acogida grandi cu e noticiero Enfoke ta conta cu ne na Aruba y den henter Reino Hulandes. No solamente pa su contenido, sin sconde nada, pero tambe pa e forma unico cu Nelson Andrade y Patrick Paskel ta present’e, combinando analisis, informacion balansa pero cu un poco humor.
Mester bisa cu pa loke ta transmision di carnaval, e siguiente parada cu lo transmiti atrobe ta e Gran Parada Grandi di Carnaval na Oranjestad diadomingo awo, atrobe for di Vondellaan. Ey lo tin un elenco grandi di presentado pa trece e cobertura aki pa tur cu ta desea di sigui un transmision unico di parada di carnaval, yena di entretenimento y noticia fresco sosodiendo na e momento ey. Pa diadomingo awo, lo por mira e transmision tambe via canal 55 riba Cable TV, via Dutch Caribbean Television.
