Aruba a haya bishita di un persona di masha reconocemento den mundo di karate. Ta trata aki di Antonio Diaz, kende ta procedente di Venezuela. Su bishita na Aruba ta pa yuda pasa su conocemento na atletanan den e ramo di karate.
Ta papia aki di un atleta cu ta dos biaha campeon mundial den @kata. Banda di esaki e tin e record mundial di e atleta cu mas medaya gana (den e disciplina aki) den campeonatonan mundial.
Aworaki e ta na Aruba pa duna algun les na atletanan local di Dojo Budokan karate-Do pa subi e nivel di principalmente e muchanan hoben. Manera ta conoci den e tipo di disciplinanan aki, no solamente ta siñanan e tecnicanan aki, pero tambe e balornan di bida. “Karate no ta solamente un deporte pero un forma di bida. P’esey cu e lesnan aki ta siña tambe respet, disciplina y motiva nan pa no solamente un bon atleta pero tambe un miho persona.”
Esaki tabata di tres biaha cu e ta na Aruba. Ultimo biaha cu el a pisa suela Arubano tabata cinco aña pasa. Sinembargo a manda diferente instructor Aruba den e ultimo cinco añanan pa duna curso mientras cu e grupo di atleta tabata bou guia di Sensei Eduardo Masias. Sinembargo el a priminti di lo bishita di forma mas regular.
Awo e grupo cu a haya les ta esnan di 4 te cu 15 aña.
@Kata, na Hapones, ta nifica “forma”. Practica di “kata” of e forma- y posturanan corecto ta encera un parti integral di diferente parti di entrenamento di arte marcial, specialmente esunnan originario di Okinawa, Hapon. E disciplinanan di arte marcial manera karate, judo, iaido, kenpo ta e principal ehempelnan.
KEN TA ANTONIO DIAZ
Antonio José Díaz Fernández a nace na Caracas, Venezuela, y cu su 6 aña el a cuminsa train karate bou apoyo di su tata y na 1993 el a haya su prome oro como seleccion nacional den e di V Campeonato Panamericano Juvenil de Karate, teni na Puerto Rico, den e disciplina di kumité. Sinembargo, añanan despues, el a cuminsa competi den torneo di adulto cu apenas 19 aña y a specialisa den Kata, ganando varios medaya den competencia y campeonatonan internacional.
El a logra medaya den 5 campeonato mundial.
