Durante e weekend di 23 cu 24 di januari ultimo a tuma luga un evento di karting na Corsou. E actividad a tuma luga rib’e parkeerplaats di Santa Barbara Beach. A converti e parking lot den un pista di karting. E piloto Matthew Paesch di Aruba a competi den e actividad aki y a logra titula campeon den su categoria. Paesch ta un di e pilotonan mas popular na Aruba pa locual ta trata karting. El a logra sali na prome luga den e categoria di shifter. El a haci un bon papel den e categoria di tag senior tambe, pero debi na su peso a descualific’e, sino e lo a logra titula campeon tambe.
Un evento asina ta hopi importante pa e piloto, mirando cu pa awo ta dificil pa participa na eventonan den exterior manera Colombia, Merca y Europa debi na e pandemia. Mirando cu ta cerca di cas, ta hacie mas accesibel. Paesch a competi cu pilotonan di Corsou mes y tambe un coredo campeon di Europa. El a logra bataya duro contra nan y logra e titulo maximo.
Den luna di maart lo tin un proximo evento na Corsou mes, sea lo ta riba e parking lot di Santa Barbara Beach of den e parkeerplaats di e centro comercial Sambil. E evento aki ta contribui na preparacion p’e piloto Paesch mirando cu pronto lo tin un evento grandi na Colombia, esta Rok Cup( Panamerican Race of Champ).
