Awe merdia Gobierno di Canada a anuncia, cu debi na e situacion bayendo fo’i control den Latino America y Caribe, cu ta stop tur vuelo pa e areanan aki desde diadomingo. Cu esey, aerolineanan cu ta bulando pa Aruba lo stop diadomingo awo, sigur te cu fin di april. Consecuentemente nos isla ta bay mas atras den cantidad di turista yegando pa e siguiente tres lunanan, esta februari, maart y april 2021.
Aruba Tourism Authority:
“Manera indica caba, nos ta inicia 2021 cu hopi cambio”, asina Ronella Croes, CEO di Aruba Tourism Authority a duna di conoce den un reaccion na e portal di noticia aki. “Esaki ta otro cambio atrobe di un mercado cu ta hopi importante pa Aruba. E ta e di 3 of 4 mercado mas grandi pa Aruba, un mercado cu a crece e ultimo aña sigur”.
Mas leu e director di Aruba Tourism Authority a sigui splica cu awo ta mira un barera adicional for di e mercado aki pa Aruba. E ta comprondibel mirando e situacion cu mester contraaresta e virus. ATA lo sigui monitorea e situacion, ta sigui e situacion di cerca cu tur socio. “Manera mercado habri atrobe lo haci tur esfuerso pa atrae turistanan bek for di e mercado aki y pa yega e target pa 2021”, di acuerdo cu Ronella Croes di ATA.
Aruba Hotel and Tourism Association (AHATA):
“Nos ta keda haya contratiempo pa recuperacion di nos turismo y economia”, tabata e prome reaccion di Tisa LaSorte-Henriquez di Aruba Hotel and Tourism Association (AHATA), riba nos pregunta relaciona cu e anuncio di Canada riba vuelonan pa Latino America y Caribe.
“Ta obvio cu tanten cu e virus no ta bao di control, nos no por conta riba crecemento. Esey kiermen cu pa e lunanan nos dilanti nos ta keda fia di futuro pa sobrevivi”, di acuerdo cu e ehecutivo di AHATA, cu ta bin for di e sector hotelero y conoce e mercado den su plant’i man.
“Nos tin casi un aña den crisis y reforma di ley laboral acopla cu plan social ta hopi urgente. No por warda mas”, tabata e ultimo sugerencia di Tisa LaSorte-Henriquez na Gobierno di Aruba. Esaki debi cu, aunke gobierno a confirma di ta di acuerdo cu e reformanan cu nan mes a propone, toch pa un motibo of otro, ainda no tin fin di implementa e cambionan. Tanten cu no haci e cambionan aki, negoshinan ta sigui confronta mas problema serio cu pago di salario y otro beneficionan. Ta necesario pa reforma urgente pa por garantisa pan di un parti di e empleadonan den e compania.
