Pa mas of menos 9:00 pm a yega un vuelo Air Ambulance for di Corsou pa Aruba, cu un pashent contagia cu Covid-19 abordo. Esaki ta den cuadro di e acuerdo di cooperacion cu tin actualmente entre Curacao Medical Center di Corsou y Dr. Horacio E. Oduber Hospital di Aruba. Specialistanan ta comunica directamente cu otro y ta manda pashentnan Aruba debi cu e hospital nobo na Corsou no por maneha e fluho di pashentnan yegando malo eynan.
Awe merdia Hospital di Aruba a informa cu nan tin 32 pashent interna. Den cambernan regular di Covid-19 tin no menos cu 19 persona interna, pero ningun ta di afo. E reto awor ta e unidad di cuido intensivo, unda ta interna pashentnan cu complicacion mas serio di halamento di rosea pa cual ta necesario pa conecta nan riba mashin. Ey tin 13 pashent interna, di cual 7 ta for di Corsou/Boneiro y 6 ta local.
Mas pashent di Corsou cu di Aruba
Cu yegada di un otro pashent awe nochi, e cantidad di pashentnan den cuido intensivo ta sigui aumenta. Na Aruba ainda nos tin espacio den nos unidad di cuido intensivo y tin mas capacidad na mashin di halamento di rosea pa nos rumannan di Corsou y Boneiro. Claro cu e ekipo di specialistanan di Aruba ta garantisa cu ta mantene cama pa nos propio hendenan, pero ta tene cuenta tambe cu e situacion alarmante na nos islanan bisiña.
Hulanda brindando extra sosten
Gobierno di Hulanda a manda por lo menos 20 dokter y nurse for di madre patria pa yuda na Corsou, debi cu ey tin falta di capacidad, di ekiponan necesario y di recurso humano pa por brinda cuido di calidad na pashentnan di Covid-19. Specialmente despues cu a descubri e variante di Brazil, cu a plama bou di e habitantenan. E variante ta mas contagioso pero specialmente mas peligroso tambe, pasobra generalmente e ta haci e pashentnan infecta mas malo y ta ataca nan pulmon di forma feros.
Acuerdo Corsou-Aruba
E siman aki Corsou a anuncia cu nan tabatin 120 pashent contagia cu Covid-19 interna den Curacao Medical Center. Door di haci adaptacion den e programa di cuido, Aruba a ofrece Corsou 30 cama riba afdeling regular y 6 cama riba ICU. Entretanto a acomoda como 8 pashent caba den cuido intensivo na Aruba. E reto no necesariamente ta cama y ekipo, sino mas bien recurso humano pa por cuida e pashentnan aki. Den esey e personal medico y di cuido di Dr. Horacio E. Oduber Hospital ta haciendo nan maximo esfuerso pa duna extra di nan pa cura tur e pashentnan, tanto esunnan local como di Corsou y Boneiro.
Tocante Curacao Medical Center
Di 10 di november 2019 a inaugura Curacao Medical Center, cu a haya e nomber “Hospital nobo Otrabanda”. E edificio nobo a bin pa reemplasa Sint Elisabeth Hospitaal situa net den banda ey mes. E ultimo ey tabata existi desde 1855.
Tocante Dr. Horacio E. Oduber Hospital
Dr. Horacio E. Oduber ta existi desde aña 1976 y su nomber ta na honor di e prome dokter Arubiano. Cu mas di 900 empleado trahando diariamente, ta atende mas di 16.000 pashent pa aña. Hospital ta conta cu 217 cama y ta brinda un variedad grandi di servicio medico na nos comunidad y na turistanan. Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona.
