Despues di a sirbi e fundacion pa por lo menos 20 aña largo, e siman aki Salvador Franken, e cara conoci di Parke Nacional Arikok a haya un pakete pa e bay su cas. Cu 64 aña di edad, awor e ta cuminsa un etapa nobo den su bida. E stima naturalesa asina tanto, cu e lo keda traha den e mesun ramo, pero awor riba su mes y pa su mes.
Salvador Franken a cuminsa traha cu Parke Arikok for di momento cu a habri e parke oficialmente na aña 2000. No a dura mucho cu el a bira Head Park Ranger y tabata encarga cu schedule di e rangernan y percura cu tur e postnan di control tin ranger pa eherce e trabou. Tambe ta sigura cu e calidad di tour na bishitantenan ta keda halto, rico na informacion y historia di e parke, e bestianan y matanan cu tin eyden. Den un solo palabra, un hike cu tur informaciondi flora, fauna y naturalesa di nos isla.
Den un carta na su coleganan, el a skirbi: “Na tur mi ex coleganan, danki pa nos por a traha hunto den bon y mal tempo. Un danki, pa e confiansa ta bay na tur e studiantenan cu mi por a yuda cu nan lesnan over di naturalesa. Un danki tambe na tur e docentenan di diferente scol cu a pone nan confiansa den mi, pa presentacion na scol of parke. Na tur e hobennan di SVT cu mi tawata ta cla pa duna un man. Danki ta bay tambe na Cuerpo Policial, Cuerpo di Bombero y Servicio di Ambulance, cu a pone nan confiansa den mi, ora tawatin un emergencia. No tawata importa e ora. Na e pueblo di Aruba danki tambe, cu mester a busca colebranan na nan cas, sea den dia of anochi. Mi deseo ta pa pasa tur mi conocemento di naturalesa pa e hobennan. DANKI DI CURASON”.
Tocante Parke Nacional Arikok
Parke Nacional Arikok ta un zona asigna na proteccion di naturalesa cu ta situa den a parti noordoost di Aruba. A pesar cu e plannan tabata data di e añanan sesenta, Gobierno di Aruba a ratifica e parke oficialmente te na aña 2000. Despues cu a lanta un fundacion na aña 2003, a ricibi 7.1 miyon euro di Fondo Europeo pa Desaroyo, cual tabata destina pa e infrastructura di e parke. E parke ta cubri 18% di e superficie di e isla, di cual 34 km² ta area di naturalesa birgen. Meta di Parke Nacional Arikok ta pa conserva, maneha y proteha flora, fauna y cultura Arubano y pa proteha simbolonan cultural dentro di e parke. E parke ta dividi den tres area: dos zona “keto” unda influencia humano ta masha limita y un zona unda mas actividad por tuma lugar.
