Awe tardi polis na aeropuerto a detene e sospechoso Pierre Philip Giraud naci na Francia, net prome cu e subi vuelo y bandona Aruba. A gar’e cu riba 10 mil dollar efectivo den su poder, sin cu el a declara esaki. Aunke e suma no tabata dje halto ey, mester bisa cu e homber parce tin mas cos cu e mester duna cuenta pe.
Ayera a keh’e na recherche cu e lo a malversa comerciantenan local riba 80 mil dollar, cu el a cambia pa bitcoin pero a duna nan placa falso! E transaccion efectivo aki a tuma luga te na Brusellas, pero awo e problema a sigui te na Aruba, pa cual a institui un investigacion penal.
Aunke e pago cu dollar falso a tuma luga na Bruselas, tog ta aki mes na Aruba a haci e deal. Esey nifica cu parcialmente na Aruba por haci denuncia y asina cana e caminda penal contra e sospechoso. E sospechoso aki tambe ta un comerciante y tin negoshi di bebida den Bochincha Container Yard. E victimanan di e desfalco ta insisti cu e comerciante Frances lo a bende su negoshi cu e mesun doñonan di Bochincha, cu tambe ta den negoshi di bende biña.
Diahuebs el a purba bandona Aruba, pero no a conta cu polis ta sperando riba dje na aeropuerto. E personal special di Afpakteam cu control financiero a bay na Migracion busc’e. Djey a bin cune na Duana unda a procesa un ke otro. Di eynan e team di Recherche cu ta atende cu casonan di labamento di placa y transaccionnan ilicito a pidi pa hib’e ward’i polis pa asina sigui e investigacion.
Mientras cu tur esaki ta pasando, e grupo local cu a bay gamble Bitcoin cu e Francesnan aki, awe kier haya nan placa bek. E suma cu nan a gamble cu nan Bitcoin ta 80 mil dollar. Berdad nan a haya e placa cash pero tur biyete tabata falso. Awe nan no por haya nan Bitcoin bek y ta pega cu e 80 mil dollar falso. E placa falso ainda ta den Europa pendiente pa husticia atende e caso pa nan.
E homber deteni tin un otro famia mas di dje, Leonard Stephan Novelli, cu ta den Europa keto bay moviendo. Esey ta esun cu ta testigo ora cu a trece y conta e 80 mil dollar a cambio di Bitcoin, cu awe a resulta di ta falso. E homber deteni na Aruba tin cas tambe. E storia aki ta un storia cu ta mustra un hit pisa cu dollar falso y e famoso Bitcoin.
Diahuebs anochi mes parce autoridad a laga Pierre Philip Giraud den libertad. Probablemente e suma di mas cu 10 mil dollar cu e kier a bandona Aruba cu ne si a keda confisca, pendiente mas investigacion. E victimanan di desfalco awor lo probecha cu e no a bandona Aruba, pa purba pone beslag riba su paspoort y otro pertenencianan tanten cu e no paga esunnan cu el a “hit” cu dollar falso.
