Diasabra ultimo a termina e seminario di Olympic Weightlifting organisa pa e trainernan Jonathan Wever y conhuntamente cu Jeremain Maduro. E seminario aki a dura 3 dia unda cu 3 siman riba Diasabra mainta, a trata tur topico cu tin di haber cu e deporte. E seminario aki ta uno cu tabata habri pa tur hende por participa, sin importa nivel, di ki deporte of unda e persona lo train normalmente. Obhetivo principal di e seminario aki tabata pa sigi promove e deporte di Olympic Weightlifting den nos comunidad deportivo, educa e atletanan riba e beneficionan di esaki, sea como deporte principal of como training den preparacion pa otro deporte. Den particular p’e deporte di CrossFit, cu e atletenan di e deporte aki tabata como mayoria den participacion durante e seminario, e ta conoci como un pilar fundamental di CrossFit.
Durante e seminario, por a conta cu por lo menos un 22 atleta cu a participa durante tur tres dia, y algun mas cu a bin por lo menos uno di e tres dia nan. Remarcabel ta e hecho cu a conta cu participacion di varios diferente gym/club, cu ta mustra cu e interesa pa e deporte ta halto. Ademas di tin varios atleta prinicipiante cu a participa, por a conta cu bon cantidad di atletanan di un rendimiento mas halto, cu a participa pa asina sigi mehora nan tecnica den e deporte. Algun di e atletanan cu a participa te hasta ta representa Aruba regularmente den eventonan Internacional di Crossfit.
E prome dos dia di e seminario a concentra mas riba e parti teoretico di e deporte, splicando tur e aspectonan tecnico, e reglanan cu ta forma parti di e deporte ora di compete y e principionan base di e deporte, cu facilmente aplica na otro deporte. Kinan a duna basta demonstracion sea via medionan digital of den persona, y asina tambe a laga e participantenan hasi algun movimiento pa familiarisa nan mes cu e splicacionan cu a duna. Un aspect cu sigur a duna hopi atencion na dje, como e ta di gran importancia, especialmente pa atletanan adulto, ta e parti di “warmup” y con pa prepara e curpa pa e demandanan di e deporte aki.
A logra splica ampliamente kico tur por haci y dicon ta haci esaki, pa asina por compronde tur cos y mas facil aplica despues. Durante e di tres dia di e seminario, a culmina e lesnan door di hasi un prueba practico, unda cu tur atleta a haya tempo pa prepara y stretch, despues sigi door di pone den practica e 2 disciplinan cu ta forma parti di Olympic Weightlifting, e “snatch” y e “clean&jerk”. Cada un parti a haya su tempo, pa asina e entrenadornan por controla y coregi cualkier eror cu tatata bin, y na mesun momemto tin mas un “hands on approach” di coaching, por medio di coregi en bibo of haci demonstracion.
Paradise Strength Aruba (PSA) y BFN CrossFit lo kier duna danki BodyfitnessGym & Nutrition pa asisti den e proceso di por organiza e evento, como nan a duna e espacio pa por hasi asi gratuitamente pa tur hende por participa sin gasto adicional. Ademas, ta duna danki na tur atleta cu a dicidi di participa durante e curso aki, y asina ki por sigi promove e deporte y eleva su nivel.
